Tvoyage van Mher Joos van Ghistele

(IV, 11)

[A]lle de voorseyde plecken ghesien ende ghevisenteert hebbende ende voort reisende den rechten wech, zo comt men ter plaetsen ghenoumt de sepultuere vanden Joden oft Sepulcra Concupiscencie,⁴⁹ daer tvolc van Ysrael murmureerden jeghens Onsen (243r) Lieven Heere om dat zij gheen vleesch en hadden tetene ghelijc zij in Egipten plaghen thebbene, niet ghepaeit zijnde met manna dat hemlieden God daghelicx sant, daer omme Onse Heere hemlieden sant zo groote menichte van ghevoghelte, dat zijer af verwalghden, ende plaechdese daer naer met grooter menichten, die alle begraven worden te dier plecken ende daer omme es noch ghenaemt Sepulcra Concupiscencie, ghelijcmen daer af leest int bouc van Numeri int xi^e capittele. Item dese plecke es bij eender plaetsen daer vooren af ghesproken es, ghenaemt Raphadim. Ende ghenouch tusschen beeden zo plocht te stane eenen aultaer up eene hoochde oft eenen grooten muelen wal ware, steenrootsachtich, ghenaemt Dominus Exultatio Mea. Ter causen dat Josue als capitein vanden volke van Ysrael vechtende jeghen Amalech den coninc, Moeyses was ghegaen up die voorseyde hoogde, Gode biddende om victorie, ende also langhe als hij bat metten handen te Gode waert, zo hadde Josue victorie, maer zijne handen neder dalende van moetheden, zo trionfeerde de coninc Amalech, zo dat Aron ende Huur elc over een zijde de handen van Moeyses up hilden, zo langhe dat God de gheele victorie Josueen toe sant, zomen daer af breeder bevindt int bouc van Exodo int xvii^e capitel. Scheedende vander voorseyder plaetsen ende wat weechs voort rijdende, zo comt men weder ten clooster van Sente Kathelijnen, daer zij wat tijts rusten, noch bet visiterende tvoorseyde clooster. Item omme wat te spreken vander weerdicheit des voorseits (243v) cloosters, zo salmen weten dat in voorleden tijden plaghen te stane inde beerghen ende wildernessen daer onttrent zeven hondert ende dertich vermaerde cloosters, zonder alle de cappellen, clusen ende heremitaigen, dier ooc vele waren, daer wel persoonen in waren teender tijt tooten ghetale van drie ende dertich dusent, alle obedient den voorghenomdem clooster, zo datte de broeders warachtelic affirmeerden, maer nu eist ghedestrueert, uut-ghedaen den plecken vooren verhaelt. Item in dese maertse, meest daer onttrent dat waterachtich es, zo wassen manieren van langhen gheerden, recht als roeden van haselaren, daer af men seit dat de roede was die God Moyses gaf, daer bij hem

49 Het huidige Kibrôth Tha'ava.

[p. 252]

instituerende rechter over tvolc van Ysrael, metter welker roeden hij alle de mirakelen ende teeckenen dede, daer af men leest ten bibel in diverssche capitelen.