Tvoyage van Mher Joos van Ghistele

[p. 244]

(IV, 7)

[A]l tvoorseyde dus ghevisenteert hebbende, zo begheerden zijlieden met alder neerensticheden ande religieusen van daer te moghen siene de reliquien vander reynder maghet Sente Kathelinen, daer omme zij daer commen waren, twelke hemlieden gheconsenteert wart, ende waren gheleedt toot der voorseyder tomben, de welke wat verheven staet, viercandt van fautsoene, van witten marberen steenen, daer inne ghegrouft staen vele manieren van beelden over alle sijden; up dese tombe es ghemaect een engienkin daermen mede up licht tdecxele datter up leyt, ende die gheopent zijnde met grooter ceremonien singhende diverssche colecten (235r) ende orisoenen, ende naer alle behoorlicke devotien ghedaen, zo worden hemlieden ghetoocht de reliquien van Sente Kathelinen, de zelve die daer zijn. Te wetene haer hooft ende den slinckeren arem, vanden welken ooc eeneghe sticken ghebraken, ende insghelijcx sommeghe andere leden vanden rechteren aerme; anders gheen bescheet breeder en consten zij daer af ghesien. Maer om warachtelic te spreken van haeren reliquien int generale, dat ware difficile om doen, ghemeerct dat de Jorgianen zegghen dat zij den rechteren aerm hebben. Insghelijcx segghen de heeren van Rodes dat zij ooc eenen arem hebben, ende meer andere zegghen van ghelijcken, waer omme ment Gode bevelen sal. Item de broeders seyden hemlieden ooc dat in ouden tijden uuten voorseiden reliquien placht overvloyelic olie te druppene die zeere zonderlinghe ende medecinael was, maer nu ter tijt zo en gheschiet dat zo meerckelic niet, want hare reliquien als nu al bloot ende drooghe ligghen. Ooc zo seyden de zelve broeders dat in tijden voorleden, alle jare eens, daer plaghen te commene groote menichte van voghelen, elc bringhende in huer becxkin een tacxkin van eenen olijfboom,³⁴ dwelc ooc nu ter tijt niet meer en gheschiet, maer uut wat zaken dat dese veranderinghe gheschiet zij, en weten zij niet, anders dan dat den wille Gods zo es.

34 Dit wonderlijk verhaal leest men ook bij Jan van Mandeville, kol. 50.