Tvoyage van Mher Joos van Ghistele
(1998)–Ambrosius Zeebout–
Auteursrechtelijk beschermd
[pagina 206]
| |
(III, 26)[D]it voorseyde al leden zijnde, zo comt men up de riviere voornoemt in een schoon duerp daer vele kerstenen woonen van dien lande, die daer eene keercke hebben, ghewijt inde eere vanden heleghen rudder Sent Jooris, daer in zij zegghen dat noch rust dmeeste deel van zijnen lichaem in eene schoone tombe in eenen muer ghemetst zeere vaste met ijserin traelgen, ter slincker hand vanden choore in eenen houc zomen ter keercken in comt. Dese keercke es daer in grooter reverencien ghehouden also wel vanden heydenen als vanden kerstenen, ende altoes up Onser Vrauwen dach in maerte zo es daer eenen grooten ganc inder ghelijcke als te Lamaterea daer vooren af gheseit es, want zij zegghen dat daer Maria de moeder Ons Heeren wat tijts ruste met haren zone, doen zij van Babilonien schiet, ghevloden zijnde uuten lande (201r) van beloften. Dus commen zijnde ten voornoemden doorpe, zo gaven de voorseyde alle hare peerden ende mulen oorlof, betalende ende ghenouch doende den heydenen ende mockers die hemlieden daer ghebrocht hadden. Ooc de mammelucken die met commen waren, sonden hare peerden thuuswaert. Ende huerden een scip datmen daer naemt een jerme,Ga naar eind126 dwelc hemlieden voerde de riviere up omtrent een dachvaert, onder weghe siende over beede zijden der zelver riviere onsprekelicke vele dorpen, zeere groot ende wel bewoont, toot dat zij quamen daer zij uuten schepe gheleedt waren omtrent een half mijle vander rivieren ten deserte waert in, teender plecken daer in tijden voorleden eene groote stede ghestaen heeft zoot schijnt, maer als nu al te nieuten, anders dander noch staet een cloosterkin daer vijf oft zes religieusen in woonen, houdende der Griecken gheloove. Dese plaetse es daer ghenaemt Saka Hemesie.Ga naar eind127 Ter welker plecken heeft ghestaen, zoomen seit, den dadelboom die neder boech doe Maria met Jhesum daer voor bij leet, omme dat zij vanden vruchten plucken zoude, ende daer naer zo rechte hij weder uppe ghelijc hij te vooren ghestaen hadde, alzo daer af ghescreven staet int bouc De Infancia Salvatoris.Ga naar eind128 De wortel ende struuc van dien zelven boome, zo de broeders zegghen, wart daer noch ghetoocht ten voorseyden cloosterkin onder den hooghen aultaer staende. Van deser plecken weder commen zijnde thaerlieder scepe, zo voeren zij noch ter rivieren (201v) waert uppe, altoes latende over beede zijden vele schoonder doorpen ende behuusde plecken, woonende vul kerstenen van dien lande, toot dat zij quamen teenen schoonen doorpe, ghenaemt Bobissay,Ga naar eind129 daer eene keercke staet, ghehouden vanden kerstenen jacobiten, inde welke rusten twee lichamen van tween heleghen mannen die daer ligghen in twee schoone tomben, verscheeden staende deen vanden anderen omtrent twee stappen, vanden welken de lieden zegghen dat als daer int land eeneghe beseten meinsschen zijn ende bracht werden ter voorseyder keercken ghebonden, gheketent, ende zo gheleit tusschen den voornoemden tween tomben eenen nacht, met anderen seremonien ende bemaninghen daer toe dienende, datmense tsanderdaeghs doot vindt of ghenesen, dwelc men daer daghelicx siet ghebueren. |