Triumphus Cupidinis. Encomium matrimonii. Nederlantsche poëmata

[p. 322]

Ode
Oft Lof-sanck ter eeren den lof-baren wijsen Hoogh-gheleerden ende seer eerweerdighen Heere Myn Heer Ioan. Chrisostimvs vander Sterren,

Prior vande witte Ordre vande Premonstreyt, binnen Antwerpen.
Op sijnen boeck: het leven ende Miraculen vanden H. Norbertvs.

GOdt heeft hier alle dinck met sijn cieraet verfraeyt,
Het aerdt-rijck geborduert, met bloemkens, cruyt, en boomen
Met voghelen de loeght, met visch de vvater stroomen,

[p. 323]

 

Des hemels blauvv-ghevvelft met sterren dicht besaeyt.

 

 

 

Om dese reden is t'dat Iesu-Sirach seyt⁺

 

Dat s'hemels Glori, is de claerheyt Vander Sterren,

 

Wiens licht de duysternis dit Babilon vol vverren

 

Verlichte, door de cracht van Godts almoghentheyt.

 

 

 

Sirach meynt niet alleen den hemel diemen siet:

 

Maer oock den hemel hoogh der glori, moet men dincken,

 

Waer in de heyl'ghen Godts, als clare sterren blincken

 

Ghelijck Norbertus, die sijn licht hier lichten liet.

 

 

 

Ghemerckt dat de Schriftuer, de Christen-kerck vol vred'

 

Oock eenen hemel noemt: soo is oock inder vvaerheyt

 

T'licht vander Sterren haer cieraet, d'vvelck is de claerheyt

 

Der heyl'ghe schriften nut, van hare leeraers med',

+ Ecles. c. 43. Species caeli gloria stellarum, mundũ illuminans in excelsis Dominus.

[p. 324]

 

In desen hemel, is een licht cieraet, en sterr',

 

Die hier in desen boeck soo constich heeft gheschreuen

 

Tot sticht, en tot ghedacht Norbertus heylich leuen,

 

Wiens Glori, lof, en eer, claer glansich schijnt van verr'.

 

 

 

T'schijnt dat den vvijsen man, voorsegghende, dit schrijft

 

Van hem vviens lof-baer daet, dees spreuck brenght in memori

 

Die Vander Sterren heet, vviens doen, is t'licht, tot glori

 

Des hemels van sijn vvoon, daer hem groott' eer van blijft,

 

 

 

Den Goddelijcken gheest, die stadich drijft, en stiert

 

Sijn redens tongh, en pen, vvilt ons t'verstant verlichten?

 

Dat vvy naer sijn verdinst, hem lof-sangh moghen dichten,

 

Wiens hooft vvel vveerdich is met lauvvers groen gheciert.

FINIS.