Triumphus Cupidinis. Encomium matrimonii. Nederlantsche poëmata

[p. 306]

Epitheton
Ter eeren den lof-samen wijsen ende wel gheleerden heere H. Petrvs Dircxsens,
Professie doende inde Oorden van den H. Bernardvs.

⁺ VErmomde vverelt boosch, vvree vyandin der deucht,
Voegh-dersse vande sond', verleydster vande jeucht
Wat is u vveld', u hop'? vvat sijn u boose lusten?

+ Matt. c. 19. Sunt enim eunuchi qui de matris vtero sic nati sunt: & sunt eunuchi, qui facti sunt ab hominibus: & sunt eunuchi qui seipsos castrauerunt propter regnum coelorum.

[p. 307]

 

Dan schaduvven, oft schijn, ja bornen der onrusten,

 

Ghy sijt een vvoeste-zee, daer menich schip in singht,

 

Daer menich schip-breuck lijt, daer menich in verdrinckt,

 

Daer de ghevvenschte hau', der salicheyt lof-vveerdich

 

By naer is onbekent, midts yder daer hooueerdich

 

Den ruymen dool-vvegh soeckt, en sijn soo seer verblint,

 

Dat sy op het compas, Climaet, baeck, sterr', oft vvint

 

En nemen gheen ghemerck, des menich als vervvaten.

 

Tot inden afgront sinckt, van alle hulp verlaten.

 

Wel gheluck-salich dan ghy Petrus dircxsens sijt

 

Die u met recht verheucht, die u met recht verblijt,

 

Dat ghy dees vvoeste zee, dees schrickelijcke baren

 

Vol grouvvsaem monsters vvreet, met vreuchden cont door-varen

 

Midts ghy tot stier-man hebt soo treffelijcken Heer

 

Diens deuchdich leuen goet, streckt yder tot een leer.

[p. 308]

 

Vol-hert, en vvort volmaeckt, op dat ghy elck moeght stichten,

 

Op dat ghy vvort door deucht, een licht, dat licht can lichten

 

In dese duyster zee, op dat ghy vvort een baeck

 

Daer al die doolt, door in behouden hau' gheraeck:

 

T'schip, daer ghy nu sijt in, is Sint Saluator clooster,

 

Den coop-man die u reet, is Christus onsen trooster,

 

De vverelt is de zee, vol sorghen, ancxt, en vrees,

 

De monsters sijn de sond', den vyandt, en het vlees,

 

Dees moet ghy vveder-staen hier moet ghy teghen vechten,

 

Hier moet ghy t'schips banier, t'cruys Christi teghen rechten,

 

Dat sy u rucken niet vvt dit seer deuchdich schip,

 

En vvorpen u mis-moet, dan op een rodts, oft clip:

 

Op dat ghy comen moeght naer dit ghedurich slauen

 

Tot t'nieuvv Ierusalem, tot in behouden hauen,

 

Daer deucht, liefd', en verdinst t'schip aenden oeuer paelt.

[p. 309]

 

Daer u den coop-man goet, dats Christus, bly onthaelt:

 

Daer hy u gheuen sal den langh ghevvenschten loone,

 

En stellen u op t'hooft de Glorieuse croone,

 

Daert alle is vervult met vreucht, en blijschap groot,

 

Daer rust is sonder eynd', en leuen sonder doot

 

Daer al de Engh'len Godts en heyl'ghe vaders bidden

 

Voor al die hier bedroeft, noch svveuen in het midden

 

Van dees onruste zee, vol onrust, en tempeest

 

D'vvelck u, en ons verleen, den Vader, Soon, en Gheest.

FINIS.

Apial. c. 14.

Hi sunt, qui cum mulieribus non coinquinati: Virgines enim sunt. Hi sequuntur Agnum quocumque ierit.