Triumphus Cupidinis. Encomium matrimonii. Nederlantsche poëmata

[p. 5]

Aen den wiisen, voor-sinnighen, geleerden, taelriicken ende seer lof-vveerdighen heere Ioan van Hincxsthoven,
Doctor inde medecynen
Raet, ende Generael vande Munten der Con. Mag. inde Landen hervvaerts ouer als Burgondien, Brabant, Vlaenderen, &c.

DEN wijsen, Cloeck-sinnigen, en wijt-beroemden Poët Horatius, int beginsel zijns Boeckx, ghetuyght dat den seer Const-lieuenden Prince Maecenas, oorsaeck was, dat hy soo ervaren ende vermaert is gheworden inde soet-luydende veerskens, ofte ghesangen, clinckende op de Liere: het welck doen was het beste, meest-gheachtste, ende

[p. 6]

aenghenaemste snaer-spel daer zijnen gheest meest scheen toe ghedreuen te zijn: ghelijck sijne schriften ghenoech ghetuyghen: meest daer hy verhaelt de gheneghentheyt der menschen. Deen seyt hy heeft lust in't snel loopen der raderen vande wagens loopende op den Bergh Olympo sprekende vande Princen te dier tijt, den Acker-man in't bouwen sijns Landts, den Coopman, in sijn goet te stellen in't gevaer der Fortunen, den wijn-suyper in't altijt goet-cier maken, den Soldaet inden crijgh, den Iagher inde Iacht, Maer ick seyt hy heb alleen lust, vreucht, en wel-behaghen in dichten, in ghesanghen, oft veerskens die soet zijn luydende op de Liere: ende voorder sprekende van Maecenas seyt aldus:

Quod si me Lyricis vatibus inseris,
Sublimi feriam sidera vertice.

Dat is:

Soo ghy my onder u Lier-sangh Poëten kent,
Soo sal ick heffen u tot bouen t'firmament.

Voorwaer Horatius die had reden Maecenam te verheffen, die hem groot

[p. 7]

ende rijck was makende, het welck aen de conste geeft veel meerderen glansch, ende luyster: ghelijck den vermaerden Poët Ouidius dat ghenoech ghetuyght segghende:

Ipse licet venias musis comitatus Homere

Si nihil attuleris ibis Homere foras.

Ende Horatius seluer al oft hy niet verwondert en was dat hy quam tot sulcken groot-achtingh, ende vermaertheyt door toe-doen van Maecenas, seyt:

Sint Maecenates non deerunt Flacce Marones.

Al ost de Maecenaten, d'oprechte beminders der conste, Maronessen, dat is de goede Poëten maeckte; het welck oock is waerachtich, want Homerus sulck een lof-weerdich Poët en soude tot sulcken armoed' niet ghecomen hebben hadde hy eenen Maecenas ghehadt ghelijck Horatium.

Om dese reden mach ick my wel gheluckich achten hebbende ghevonden, en vinde aen V.E. eenen oprechten ende waerachtighen Maecenas, door

[p. 8]

wiens toe-doen ick niet alleen ghelijck eenen Bacchus tweemael gheboren, eens wt sijn Moeder Semele, ende daer naer wt de dye van sijnen Vader, eens wt mijn Moeder daer naer wt de dye vā Iouis, dat is, wt V.E. door u welgheleerde, wijt-beroemde, ende seer ervaren-conste der Medecijnen, waer mede ghy, naest Godt, my 'tleuen hebt behouden, dat van veel Doctoren my was ontseyt. Maer bouen dien hebt mijnen Gheest die gantsch flauw, en schier bestorven was, weer leuende, ende wacker ghemaeckt, my stierende tot het oeffenen der lofbaer conste der Poësien, soo dat ick met Horatius wel segghen mach, soo ghy my onder de Poëten stelt ende brenght door u const-lieuende Ionste tot ervarentheyt, ende eenighe vermaertheyt.

Sublimi feriam sidera vertice.

Soo sal ick heffen u tot bouen 't firmament.

VVant soo Pythagoras in't minst is te gheloouen soo is Maecenas geest in ons gheluckighe eeuw' in V.E. verhuyst, ofte weer gheboren. Naer dien dan dat door raet, ende toe-doen van V.E. dese mijn ghesanghen, en gedichten

[p. 9]

zijn int licht ghecomen, tot dienst ende vermaeckinghe der Ionckheyt, en heb niet willen, niet connen, noch niet moghen laten, de selfde V.E. toe te eygenen, biddende dat V.E. die selfde sal belieuen aen te nemen met soo goeder hertē als V.E. die van my wordē op-ghedraghen, ende bidde die te beschermen ende te verwerē tegen alle nyderen, door u cloeck wijs wel gheleert Senecams verstant, ende die te verantwoorden teghē alle lasteraren door u wel gheleerde renden-rijcke Ciceronsche tonghe, al oft V.E. die eyghen aen-ginghen, dat doende sult my stieren tot een ghedurich oeffenen der Conste tot uwer eeren.

V.E. Dienstvvillighen ende onder-danighen dienaer

Ioan Ysermans.