Medicina, boek van medicinen

Van wormen in den lichame

[p. 104]

Lombricos. dat siin worme die wassen in den lichame in die darmen ende meest in kindren diese wassen van fleumen. die wassen van souter fleumen die siin ront & lanc & dese fleumen siin heet & droge. Ic en wilre nemmer af scriuen want ic hebbe anders gemict te scriuene want dese riote ware mi te lanc met luttel bedaruen. Nochtan willic elke fleume bescriuen sonderlinge & dat cort ¶ Die wassen van zoeter fleumen die heet siin & wac die worme siin lanc & plat. Die wassen van aysineger fleumen die cout es & droge die worme siin ront & cort. Die wassen van naturliker fleumen. die siin cort & breet. Die wassen van glasiinre fleumen die es cout. entie wormen en mogen niet bliuen te liue. Die lanc & ront siin die wassen gerne in die cleine darmen ende in die dunne. Ende dandere wassen gerne in den sater. die heet in latine orobus. dat es die juchte ¶ Dit siin die tekene die hebben die gene in wien dat wassen dese wormen die men heet slike. Hi geuoelt cnauwinge & bitinge in die darmen & onderwilen cortsen si diese hebben. Ende sonderlinge kindren die hebben worme. si hebben joocte in haren nese. si roeren ende creselen metten tanden. & onderwilen se spuwen sise ten monde vut. Ende onderwilen [comen] si ter cameren vut ende dat meest bi nature Entie wassen in die cleine darmen hare

[p. 105]

handen stinken gerne. & sonderlinge nucheren Alle dinc dat bitter es dat dootse ¶ Dits die cure. Die wormen in heeft. dien geeft tetene .3. dage of viere nuchtren zuete melc. Ende daerna so gef hem gestoten looc met aysine achter den vierden of den derden dach. dit salse doden ¶ Een ander stoot coolsaet & geuet hem drinken. dat dootse. Also doet apie saet. Agaric nuchtern gedronken dootse. Aloe gepuluert & daer af gemaect pillen also groet alse vitsen met zape van alsenen. van ruten of van aueronen. & dese gewimpelt in nuwelen & geswolgen al geheel ¶ Dit verslaet die slike. sap van alsenen. sap van kniewiede. puluer van bittren lupinen. puluer van centonike. puluer van hertshorne dese dingen geminct verslaen die wormen die siin in den lichame ¶ Ende siin kinderkine die geen bitter dinc en mogen nutten. dien maect dit plaester & legget hem opten nauel. die worme selender met steruen Nemt bittere lupine & aloes. dese stoot met sape van alsenen & van kniewiede. entie galle van enen stier. & tsap van centauria & van adeke & van vliedere die spreit hem opten lichame. dit sal doden die slike Maect .1. plaster van alsenen & van bolle sade gestoten & getempert met aysine. dit legt dien sugenden kindren optie mage die wormen selen steruen. Benedicta. of kartaticum jmperiale. of yerapigra. of yeralogodion dit sal die wormen doen steruen enter cameren gaen