Cyrurgie

Van den cancker in den vede.

Ende eist dat sake dat men die vorseide medicinen niet ne helpen op de gaten ende op

⁺dat dode vleesch vorseit soe eist canckere dat in den vede es. Ende omme dit canckere te ghenesene soe salmen bernen den canckere in den hals al ontrint met eener cauteriën aldus ghemaect in desen manier (fig. XLIII). ende dese soe sal men in dat vier wel heet maken ende gloien ende daer mede die corrupcie tingieren ende daer op legghen tweewarf sdages ongesouten boeter ofte onghesouten smeer ende daer of sal den brant vallen ende dan voert suveret ende heelet alsoet jou vorleert es.

+ C 73d.

Noch een ander manier jeghen den cancker in den vede.

Ende jegen viscose materie te verdrivene ende te droghene ende te helne. ¶ ℞ arcenicum alumen .ana. .Ʒ. j. bernetse te samen in eenen scerf Daernae nemt blaeu laken ende menschen quaet .ana. .Ʒ. 4. ende bernet die al gelicke Daer nae nemt .Ʒ. j. pulvere van der scorssen garnaten ende dan pulveriseert al te gader in een mortier

ende van dien pulver stroit op⁺ dat seer ende daer mede sal den cancker sterven ende als hi doot is dat saltu weten ane dat vleesch root ende scoene si ende dan suldi dat heelen met desen nae volgende pulver. ¶ ℞ aloës epatici masticis olibani .ana. .Ʒ. iij. sanguis draconis .Ʒ. j. loot asschen seruse .ana. .Ʒ. ½. hier of maect subtijl poeder ende stellet in dine bosse. Ende van desen poeder stroit tweewarf sdages op dat seer ende daer boven soe leght plasteren van witte salve gelijc dat hier nae volget. ¶ ℞ serusa .Ʒ. ij. oleum rosarum .℥. j. et ½. cera alba .℥. j. pulvis thuris pulvis mirre .ana. .Ʒ. j. fiat unguentum ponatur in pixide ende hier of maect plasteren ghelijc dat jou vorleert es Ende eist dat sake dat ghi meer manieren van salven hebben wilt die dienen ende ghenesen in desen saken. soe gaet in dat capittel van den gaten ende ulceriën in den vede. Daer vindire in staen ghenouch van vele manieren.

+ C 74a.