Cyrurgie

[p. 196]

Van dat den darmen ghewont sijn.

Alse lieden ghewont siin in de darmen daer of soe willic jou wat scriven ende alsoe vant ic ghescreven in de Cirugie van rolandine. In dat erste alse die cleenen darme ghewont is ende dien stront der hute gaet. dats oncurable ende dootwonde. Maer als den groeten vleesch darme es ghewont die es gheneselic ende dien selmen simperlic

⁺cureren met drancken ghelijc wonden dranc ende drancke vindi ghenouch ghescreven int cappitele van den ghescutte hutte te doene ende is die wonde groet in den darme soe selmense toe nayen ende laten den draet hanghen buten op den buuc ende men sel die darmen in legghen in hore gherechte stede. ende men sel die wonden des buucs open houwen tote die darmen heel si ende als ghi erst der toe comt doet die darmen in ende siin si buten vercout ende gheswollen soe selmense weder verwarmen met warmen wijne of met anderen warmen dinghen ende eist dat sake datsi niet alsoe moghen ingaen soe moetmen die wonde wijden met eenen scersse. (zie fig. XXVIII) ende dan doen die darmen weder in ende dan cuereren alse ander wonden in den buuc.

+ C 68d.