Cyrurgie

Nu willic jou bescriven van eener siecheit datmen heet laserscap.

Van lepra ofte laserscap. dat es eene vulle siecheit en(de) van laseriën siin iiij. manieren ofte speciën. ende men selse bekennen alsoe. Daer es eene maniere van speciën commende van verrotte flumen ende die heet tyria naer een serpent dat woent in jerico het is van hem gesproken ende heet. tyria. dats siine name ofte vipera. Tyri dat serpent heeft eene maniere dat hem dat vel of gaet ende alst oud es dan wasset hem weder ende eist soe dat hem siin lijf of gaet ende magher ghenouch is dan vindet hem tusschen .ij. hauten dat daer in blijft siin vel. dwelke vel men heet spolium splenter in latine dwelke vel es seer medicinael in vele siecheeden.

¶ Nou selmen leeren kennen dese manieren van desen evele dats bi den oegen te siene ende bi der materiën ende oec maniere des lichams Dese specie van laserscap diemen heet tyri soe comt van manieren van spijsen vele nuttende Die van complexiën es flumatic ende die van

⁺usagen eeten werrotten visschen van humoren van flumen van aelen ende palingen carpers herders ende die hoere voetsele halen in de wase. Item soete melc gansen zwanen ende alsoe wie hier mede leeft het en is gheen wonder sine worden lasers ende sonderlinghe die flumatijc sijn.

+ C 55c.