Cap. 21.
¶ Va(n) geswollene(n) spene(n) te vorsiene.
Dicken gevalt dat die spenen groet siin geswollen dat si
Ga naar margenoot+niet lichtelike en mogen verdwinen. men steecse ontwee met ere vliemen. so loopt dat bloet ute ende si genesen cortelinge daer na. Actor seit dat hi wel heeft geweten van lieden die ziec waren dat si daer bi genasen. ¶ Sulke meesters gebieden dat mense afcnope met gewasten draden. in dien dat die lichame gepurgiert ware also men hier voren geseit heeft met medicinen ende datter toe behort. men machse genesen daerbi. Ende waert dat mense ave cnochte eer die lichame gepurgiert ware. men daden ter avonturen sterven. want die draet soude vorten die spenen daer bi af vallen. bi dat hi niet gepurgiert en es. dat bloet dat daer gewone was te lopene ten spenen neder. bi dattie spenen af siin maect .1. gat dat bloet ter stede. so dat die gene gefisteleert blijft. Waert datter geen gat en ware. dat bloet soude opkeren ende versmoren die lede van binnen. entie gene daer bi sterven. Daer bi radic elken te wesene vorsien eer hi enege dingen doet. ¶ Hier bi seit ons nature. so wat menscen tongemake es in enech led of in enege stede van sinen live van misseliken humoren comende vanden hoofde toten voeten purgiert men sinen lichame hi es te sekere te genesene. ¶ Sulke meesters siin die nemen een lanc yser. an deen ende eist gelijc enen nagele plat. ende gegloytent (l. gegloyt) ende stekent iegen elke spene in dien dat die lichame gepurgiert ware si daden wel ende genasen daer met. Ware die lichame niet gepurgiert bi der hitten van den ysere comende iegen die spenen die bloedende die heet siin bi dat die spenen scoren. bider hitten vanden ysere so verhit dat bloet binnen. dat die gene cort daer af sterft. En si bi vroeden rade te gevene cyroop den lichame te vercoelene. dbloet te verteerne bi den cyrope ter cameren met te gane. die lendenen met te drogene binnen ende dbloet te vercoelene. dat hi daer bi te gemake blivet ende geneest. zoete dingen boven die spenen te leggene. alse plaestren van lijnsaet oliën. van verscen swinensmoute. van honege bloeme daer in gedaen bi dat dicke becomt int gevouch. het sal die spenen verteren ende versoeten entie spenen verslaen dat die gene daer bi geneest.
Auteursrecht onbekend