Bedevaart naar Jerusalem in 1525

[p. 47]

Hoe ende in wat manieren wij peregrijnen processie ghehouden hebben in sinte rochus kercke mits oock hen dienste van dat ambacht der heiliger missen.

Als nv ghenaeckten den xviij. dach van Junio die welke sonnendach was Soe (ginghen) wij peregrijnen allegader tot sinte rochus kercke mit onse patroon Alsoet een seker regel is dat gheen galeyen ofte schepen of en varen van veneetgien na den heilighen lande Ten sij sake dat die patroon pylothen truytzelmans bootsghesellen mits alle die peregrijnen edel ende onedel cleyn ende groot eerst een singhende misse doen singhen in sinte rochus kercke tot loff ende eerwaerdicheit der heiliger drievoudicheit ende den heiligen confessoor sinte rochus, alsoe hij ghehouden wert voer een maerschalck der woester zede van pestilencien ende oeck van haestighen sieckten, alsmen wel merken mach Want dit is een wel ghecyerde kercke ende wert aldaer veel devotys ghepleecht. Item Daer hanghen alsoe veel mannen ende alsoe veel schepen alsoe veel vrouwen fighuerlick int verhemelt der kercken alsoe datmer naw doer ghesyen en kan, elck mit sijn tribulatie, die een doer houden, die ander doer kerft, die derde in perikel der wateren in schepen sonder roer sonder mast mits haer bevaerde lovende tot dit goodshuus, sijn verlost wt alle hoer tribulatien. Nota. Dit choor van deser kercken was wel suverliken toe ghemaeckt die bancken ende sittelessen al mit tapesserie overcleet, daer wij peregrijnen op saten Ende althehants soe werden ons ghetoent dat heilige lichaem van sinte rochus ende costeliken vercyert int hoghe outaer, welke outaer niet en is dan schoen marmoer ende albasteren. Item Soe wyet begheerden van enyghe paternosteren ofte crucen ofte andere cleynodyen bestreken te willen hebben, die ghaefense den priester die welke cleynodyen hij leyde op dat

[p. 48]

heilighe lichaem van sinte rochus Ende mit desen soe quamen die colleten wt hoer convent tot sinte rochus kercke al anghedaen mit costeliken ornamenten al van goude. Een costelick crucifix quam inden eersten mit veel barnende thoortzen, daer nae die goude ornamenten ende dat Ambacht der heiliger missen werden beghonnen Ende dat orghel werdde seer costelic ghespeelt ende die hooftmisse werden Seer lusteliken ghesonghen, niet mit stemmen mer werden al heel ghespeelt in musyck op schilmeyen alsoe dat dit seer lustich was om horen Ende onder die hooftmisse werden ons een troestelike sermoen ghedaen van die heilighe reyse van iherusalem ende waren daer seer wel in ghesticht Ende werden alle te samen in die bruederschap ontfanghen ons allen delachtich makende die weldaden die self daer aldaer gheschyen van daghe tot daghen. Item Dese broederschap heeft een sonderlanghe maniere die guet ende eerlick is ende is dese Soe waneer enyghe brueder ofte suster van sinte rochus verarmt ende kinderen hebben, jonghelinghen ofte maechden die tijt sijn ten huweliken state, twellick die ouders ghene machte en hebben alsoe verde alsset die gilde meesters kenneliken is Ghaen dese selfde ghilde meesters toe ende hylyken dese jonghelinck ofte maghet wt den arck van sinte rochus ende gheven haer een somme van penninghen wat mede te beghinnen. isset dattet hoer voerwaert ghaet soe sijnse wel schuldich alsoedanighe penningen weder omme dat ghilde te restitueren Ende isset bij alsoe datsij tussghen een broot ende stuck blijven in eodem Soe en gheeven sij daer niet van. Nota. Een yghelick screef sijnen name in dat ghilde boock van sinte rochus mits dat wij ghaven dat ons godt int herte styerden ende ghaven ons elcks een suverlick waskaerskijn. Nota. Alle dit over ghesleghen. als nv die hooftmisse wt was soe hyelden wij processie mits elcks een

[p. 49]

barnende witte waskars in sijn handt Ende die edele borgheren ghinghen mit ons eer bewijsende, mits dat wij peregrijnen al ghaen musten op die hoghe sijde In manieren als wij deden opten heiligen sacramentsdach Als nv dese processie ten eynde was, soe werden ons noch veel schoender reliquien ghetoent onder al een schone suverlike monstrancie daer in verburghen was een van die doornen ofte tacke wt den doorne croon ons heren ende is seer iseliken om syen Ende alle jaers opten heiligen gueden frijdach soe is dese selfden doorn alheel bebluet van boven tot beneden Ende opten bodem van deser monstrancie syet ghij perfectelick bluet legghen Ende als wij nv dit regiement wel doer syen hadden ende onse namen ingheteykent hadden in sinte rochus ghilde Soe sijn wij in ons logys gheghaen ende maeckten desen noen ghuet tcyer ende hyelden onse kermisse alsoet desen sondach tot delft ommeghanck was Ende naedie maeltijt ghinghen wij doersyen veneetgien, op des hertoochs hoff die schone ordonantie van hoer maeltijden, hoer manieren van eten ende van drincken daer ic ghenooch hyer voer of ghescreven hebbe ende deser ghelijken veel vreemdicheyden, die mijn niet mogheliken en sijn om al te bescriven, alsoe dat ick alle dinck hier bij laet blijven. Item Als nv soe beghonste den tijt te ghenaken dat wij tzeyl soude ghaen waer om een yghelick sorrichvoudich was hem onder te legghen van allen nootruftighen dinghen. hoe ende in wat manieren dat gheschyet heb ick opt lanckste hyer voer genoech van ghescreven, alsoe dat ic dat daer oeck bij laet blijven Ende wil alleen voorts onse reyse vorderen.