Oude Vlaemsche liederen (1848)

Oude Vlaemsche liederen

(1848)–J.F. Willems– rechtenstatus

Auteursrechtvrij

Vorige Volgende


CXXXIII. De pelgrims naer sint-Jacobs. 1 Dats wildi vander waerheit horen singhen, Rijc heer God, so latet mi volbringhen! Die waerheit die ic u singhen sal: Van vader ende van sone Een wonderlijc gheval. 2 Die vader sprac tot sinen soon met liste: Een so goden bevaert dat hi wiste Al op den wech sint Jacobs waert, Hi wilde wel versoeken Den milden onghespaert. 3 Mer doen si anden weghe quamen gaende, Eens waerts huis dat si daer vonden staende, Die vader totten sone sprac: ‘Wi willen ons ghelt verteren Ende houden ons ghemac.’ 4 Die waert sprac tot alle sine gasten: ‘Ic hebbe ons bereit al vanden besten, Eet, drinct ende weset vro! Wi willen ghenoechte hantieren.’ Dat sprac die waert also.
[pagina 319]
5 Mer doen die goede broeders waren gheseten, Die dochter vanden huse quam ghestreken Costelijc in dier ghewaet, Den alderjoncsten broeder Toonde si een fier ghelaet. 6 Die dochter sprac tot haren vader bouden: ‘Den alderjoncsten broeder wil ic behouden, Want hi es so edel ende fijn; Scheit hi nu van henen So swiket dat herte mijn. 7 Die vader van sinen sonen dat verhoorde, Hi antwoorde met so soeten woorde: ‘Mijn sone met mi ende ic met hem! Wi willen sint Jacob besoeken Als waerachtich pelgrem.’ 8 Tsavonts als die broeders slapen ghinghen Die dochter peinsde om haer valsche dinghen, Ende si nam eenen vergulden nap, Met verradenissen Stacken si in des vaders sac. 9 Tsmorgens als die broeders waenden ganghen So quam die valsche waert en dedese vanghen, Die waert tot sinen rechter sprac: ‘Dese heeft mi ghestolen Minen vergulden nap.’ 10 Die sone van sinen vader dat verhoorde, Hi antwoorde met so soeten woorden: ‘Ic wil voor minen vader staen, Alle sine sculden Wil ic op mi ontfaên. 11 Die heren daertoe in rade ghinghen, Den sone dat si voor den vader hinghen. Den oudsten broeder lieten si gaen. Mer hoe dat spel ten einde quam, Dat sult ghi verstaen.
[pagina 320]
12 Mer doen die vader tot sint Jacob quam Hi sprac: ‘heer sint Jacob, wat heb ic misdaen? Ic hebbe verloren minen sone Buiten sinen schulden, Helpt, here God uten trone!’ 13 Die vader offerde en quite sijn bevaert, Ende ginc wederom tsinen lande waert; Daer hi sinen sonen quam bi: ‘Och sone,’ sprac hi, ‘sone! Dese bevaert schenke ic di.’ 14 Die sone tot sinen vader sprac wederomme: ‘Die bevaert is u ghewoorden suer om doene, Verblijt u nu ende weset vro! Sinte Jacob heeft mi gheholpen, Maria uut alder noot.’ 15 Die vader verhoorde dat so gheringhe, Hi ghinc tot dier herberghe binnen, Daer laghen drie hoenderen biden vier, Doen sprac tot hem die valsche waert: ‘Wat dinghe doet ghi hier?’ 16 - ‘Ic ben die selve broeder die sint Jacobs ghinc, Doe men minen sone aen der ghalghen hinc; Mijn sone leeft noch, hi en es niet doot, Sint Jacob heeft hem gheholpen, Maria uut alder noot.’ 17 Die valsche waert begoen te grimmen: ‘Waerom liechdi met uwen schimmen? Tis also waer al overluut Als dese ghebraden hoendren Vlieghen ter doren uut.’ 18 Mer eer die waert dat woort uut sprac Deen hoen na den anderen vanden speet brac, Si vloghen opter straten, Si vloghen op sinte Dominicus huus Daer alle die broeders saten.
[pagina 321]
19 Mer doen die heren dat verhoorden Si riepen alle met lude woorden: ‘Wel op, pastoor ende capellaen! Wi willen met processie Onder dat gherechte gaen.’ 20 Mer doen si onder dat gherechte quamen Den onschuldighen man dat si af namen, Den waert dat men voor hem hinc, Die dochter werd ghedolven, Si haddet wel verdient. 21 Dit liedeken dat wi singhen is seker waer, Sinte Jacob dede groot mirakel daer: Veel broederen tughent ooc met dien, Die met haren oghen Dit wonder hebben ghesien. [Uhland's Deutsche Volkslieder, I, 803-807.]

Vorige Volgende

Over dit hoofdstuk/artikel

lied

Naar de Nederlandse Liederenbank