Oude Vlaemsche liederen
(1848)–J.F. Willems–
Auteursrechtvrij
[pagina 151]
| |
1
Hi sprac: ‘Lief, wiltu mijns gedincken,
Dinen orlof willic ontfaên;
Mijn hertebloet willic u scincken,
Dijn guetlicheit willic di laên.
Och, ghedinck mijns!’
2
Si sprac: ‘Hebbic dat wel verstaen?
Ach leider! moet wi ghesceiden sijn?
Dijn hertebloet willic ontfaên,
Ende leggent nevens dat herte mijn.
Och, ghedinck mijns!’
3
Si sprac: ‘En mach niet langher beiden
Van dies ic in mijn herte doghen?’
Wel droefelic ghinc si doe screiden:
Die tranen spronghen haer uten oghen.
Och, ghedinck mijns!
4
Doen hise soe droefelic sach screijen,
Doen droefde hem sijn herte binnen;
Doen en wilde hi niet langher beiden;
Hi sprac met enen droeven sinnen:
Och, ghedinck mijns!
5
Hi nam een mesken in sijn hant;
Hi sprac: ‘Hout van den bloede mijn!
Soe waer ghi comt in enech lant
Dat u ghedincke waeraf dat si!
Och, ghedinck mijns!’
6
Doen si dat mes ghetoghen sach,
Si sprac: ‘Saltu di selven steken?
Wat salic doen, o wi, o wach!
Mi dunct mijn herte sal mi breken.
Och, ghedinck mijns!’
| |
[pagina 152]
| |
7
Die ioncfrouwe bleef in groten sorghe:
Dat was in alsoe korter stont.
Hi nam aen hare Sint Janne te borgheGa naar voetnoot1.
Die tranen vielen haer in den mont.
Och, ghedinck mijns!
8
Si stac hem een vingerlijn aender hant,
Dat was al van finen goude;
Soe waer hi quame in enech lant,
Dat hi haers ghedincken soude.
Och, ghedinck mijns!
9
Die ioncfrouwe was van hem ghesceiden,
Ende si bleef in groten rouwe.
Si sprac: ‘Onse here God moet u gheleiden,
Ende u bescermen onse suete Vrouwe!
Och, ghedinck mijns!’
10
Die ioncfrouwe ghinck op hare camer saen;
Haer selven ginc si daer ontwinden:
Een suver cleet heeft si ane ghedaen;
Een heilech leven ghinc si doe leiden.
Och, ghedinck mijns!
Handschrift der XIVe-XVe eeuw, uit de nalatenschap Van Hulthem, thans op de Koninklyke Bibliotheek, te Brussel (Bibliotheca Hulthemiana, VI, No 192). Reeds gedrukt in myne Mengelingen, bl. 296. De melodie in myn handschrift van Anna Byns en in de Souterliedekens, 1540, psalm 3. |
|
