Oude Vlaemsche liederen

[p. 63]

XXIX.
Een nieu liedeken van den doot des hertoochs van Bourbon.
(a^o 1527.)

O God van hemelrijcke
Wat drucke es ons ghesciet,
Dien borghonschen alle ghelijcke!
God behoede Borbon voir verdriet.
Twas soe vrome een capiteyn:
Die hebben wy verloren,
Een edele heere reyn.

‘Menich slach hebbic ghesleghen,
Te paerde ende ooc te voet;
Groote victorie hebbic ghecreghen
Ter eeren den keyser soet;
Menich leet hebbic den coninc ghedaen.
Daer hy quam al voir Pavien,
Daer en mocht hy my niet ontgaen.

Melanen hebbic in ghenomen,
Met meneghen crijchsman vry;
De paus hadde dat vernomen:
Die sant hem goet volc by.
Sy meendender my wel af te slaen.
Die Veneetsianen quamen ooc mede;
Maer ten wasser niet wel vergaen.

Heel Ytalien hebbic ghedwonghen,
Ter eere den keyser fier;
Roomen hebbic bespronghen:
Daer bennic comen int dangier.
Het ghebuerde, al in den tweesten slach:
Daer bennic al deerlic doorscoten,
Daert so menich man ansach.

[p. 64]

5

 

Och! adieu Karel, lieve neve!

 

Het moet nu ghesceyden sijn;

 

Nu moet ic u begheven;

 

Het sceyden doet my pijn.

 

Ic waende met u te winnen dat helich lant;

 

Nu moet ic emmer sterven.

 

God blive nu dijn onderstant!

Adieu, ghy edel heere bouwe¹,
Adieu, graef Joris van Sassen goet!
Weest doch den keyser ghetrouwe,
Dat biddic u, vri edel bloet!
Adieu, vice roy de Napels vry!
Nu moet ic van u sceyden:
Gods bermerticheyt sta my by!’

Die heeren weenden seere,
Sy hadden groot verdriet
Al om Borbon den heere,
Dat hy soe droeffelic sciet.
Die knechten maecten groet misbaer:
Sy en wisten wat bedriven;
Deen wranc sijn handen, dander trac sijn haer.

‘Ons troost hebben wy verloren,
Ende ooc ons toeverlaet!
Ic bidde Jesum uutvercoren,
Dat hy sijn siele ontfaet!
Ghetrouwen dienst heeft hy ghedaen.
God sal wel een ander verwecken,
Die dien keyser ooc sal bystaen!’

Wy moghen wel bedriven rouwe
Om Borbon den capitein goet,
Ende voir Wassenare ghetrouwe:
Hy heeft ooc ghestort sijn bloet,
Ter eeren den keyser, dat es waer:
Men mochte gheen ghetrouwer vinden,
Dan dese twee int openbaer.

Op een strook perkament, schrift van den tyd, gebonden by de Liederen van Bartholomeus Boeckx, handschrift ter bibl. van Bourgondie, te Brussel, N^o 14275 van het inventaris.

1 Bouwe, boud, hoogmoedig.