|
| |
| |
| |
VII.
Ordonnantie van Keizer Karel den Vyfde van het jaer 1542, wegens het versterken der Stad.
Onsen Mercgraue ende Schoutet onser stadt van Antwerpen, salut.
Alsoo de Wethouderen ende Regeerders onser voorseyde stadt van Antwerpen, door onser Ordonnantie ende bevel, van meyninghe sijn, ende alreede begost hebben de selue onse Stadt te fortificeren ende sterck te maken; ende mits dien van noode sy, soe binnen als buyten der voors. Stadt, afgebroken te wordene diuersche huysen ende boomen aldaer staende: soo eest, dat Wy, desen aengesien, ende hier op gehadt dadviesen van eenighe notabele personagien, hun int stuck van orloghe verstaende; begeerende de vorderinghe vande voors. fortificatie, ter gemeyner welvaert ende versekerheyt onser voors. stadt van Antwerpen,
| |
| |
hebben by advise ende rijpe deliberatie van onse seer lieffue ende beminde sustere, de Coninginne douaigiere van Hongaryen, van Bohemen, &c., voor Ons Regente ende Gouvernante in onsen landen van herwaertsover, van den ridderen van onser ordene, ende den hoofden ende luyden van onsen Rade, geordoneert ende gestatueert, ordonneren ende statueren, de poincten ende articulen hier na volgende.
In den eersten, dat alle de gene, die alnog eenighe huysen, oft edificien ofte woensteden, boomen ende wassende hout staende hebben ontrent onse voors. stadt van Antwerpen, gehouden sullen wesen deselue huysen, edificien, woonsteden, boomen ende wassende hout, te doen afbreken ende afhouwen, rontsomme deselue onse Stadt, tusschen de lenghde van vijf hondert passen, elcken pas tot vijf voeten, maeckende tsamen twee duysent vijf hondert voeten, beginnende aen den buyten cant van het water van de vest derselue Stadt; ende dat binnen den tijt van dry weken naervolgende de publicatie deser; op peene, indien ymant sulckx in
| |
| |
ghebreke ware te doene, dat de wethouderen onser voors. Stadt sullen moeghen consenteren, dat niet gebroken ende afgehouden en soude wesen, geappliceert te worden tot proffijt van den genen, die tselue sullen willen doen afhouden, ende breken; behoudelijck nochtans, dat deselue wethouderen gehouden sullen wesen dengenen, die bedwonghen sullen wesen hunne huysen ende boomen af te breken, te versien ende te doen hebben wercklieden, tot hunnen redelijcken kosten.
Item, dat men binnen deselue limiten tot gheenen daghe en sal moeghen maeken eenighe huysen ofte edificien, boomen, ofte leuende haghen planten, noch wallen maken, in eenigherande manieren; maer wel platte ende slechte grechten, op pijne dat men deselue op costen van de proprietarisse sal afbreken, ende dat sylieden daerenbouen verbueren sullen hondert carolus guldens, voor elck huys ofte edificie, ende thien carolus guldens voor elcken boom, leuende hage, plante, oft walle.
| |
| |
Item, dat alle eygenaren ende proprietarissen de oude stoffe van alle hunne afgebrande oft afgebroken huysen, met oock alle boomen ter aerde liggende, gehouden sullen wesen wech te doen voeren, binnen den tijt van dry weken, op de pene int eerste articule gespecificeert.
Item, dat men binnen de twee hondert passen, buyten de voors. limiten, niet en sal moeghen maken eenighe steene huisen, ofte eenighe opgaende boomen planten, dan alleenelijck houeniers hoeuen, fruyt boomen, planten, ende huyskens ende cleyne woonsteden, dienende tot bewaerenisse van de selue hoeuen.
Item, dat men binnen de voors. Stadt, beginnende aen den muer derselue, de vesten sal moeten ruymen, te Stadtwaert inne, by afbreken van huysen ende afhouwen van boomen, vijf ende seuentich voeten breed, om te maken de dreue, ofte wallen, bouen breet viertich voeten, ende soo voorts, afhangende tot de voete van den seluen dreue ofte walle, noch vijf ende
| |
| |
dertich voeten; ende dat men voirt ane gheene nieuwe edificien, binnen de hondert voeten, beginnende beneden aen den voet van der dreue, en sal moeghen maken, metsen oft timmeren, op de pene voors.
Item, dat alle metsers, timmerlieden ende andere wercklieden, gehouden ende sculdich sullen wesen te comen wercken aen de voors. Stadt, des versocht sijnde, op redelijcken salaris, soo by de wethouderen der Stadt geordonneert sal werden.
Item dat, hangende den tijt der voors. fortificatie, binnen onse voors. Stadt niemant en sal moegen beginnen eenighe nieuwe edificien, het sy metselerye oft timmeragie, sonder consent van de wethouderen van onse voors. Stadt; dan alleen doen noodelijcke reparatie.
Item, dat men het clooster van de Schartroisen, nu ter tijt afgebrant sijnde, sal voort afbreken ende raseeren.
| |
| |
Item, op dat de voors. fortificatie beteren voortganck hebbe, soo hebben Wy geordoneert, dat men ter naeste plecke ende hoeue van de vesten, sal moeghen nemen soo veel eerde, als van noode wesen sal, ter minste scade van de proprietarissen; nochtans als men sal kunnen ende moghen.
Ende, op dat van tgene dat voorseyd es niemant ignorantie en pretendere, soo ordineren, lasten ende bevelen Wy v, dat ghy van stonden ane dese ordonnantie brief doet vytroepen ende publiceren, alomme binnen den bedrijue van uwe officie; procederende tegens de overtreders ende ongehoorsamen, by executie van de voors. pijne, sonder eenighe simulatie, ofte verdrach, realijcke ende by feyte; niet tegenstaende oppositien ofte appellatien gedaen ofte te doene, ende sonder prejuditie van dyen des voors. is te doene, met des er aencleeft: geuende Wy v, mitsgaders onsen Wethouderen van Antwerpen, volcome macht ende authoriteyt ende sunderlinge bevel; ontbiedende ende bevelende alle onse rechteren, officieren, burgeren, inwoonderen
| |
| |
ende ingesetenen onser voors. stadt Antwerpen, dat sy v tselve doen ernstelijck verstaen ende obedieren. Want ons alsoo gelieft. Gegeven in onse stadt van Brussele, onder onsen contra seghel, hier op gedruckt in placcate, den xvj dach Augusty int iaer ons Heren xv.c twee ende viertigh.
|
|
Auteursrechtvrij