Historisch onderzoek naer den oorsprong en den waren naem der openbare plaetsen en andere oudheden van de stad Antwerpen

[p. 213]

III.
Goedenisbrieven van ledige Erven, door de Stad verkocht in de jaren 1297, 1302 en 1303 om Stads Vesten te kunnen bouwen.

Wi Scepenen ende alle die ghemeente van Antwerpen, maken cont allen den ghenen, die dese lettren selen sien ende horen lesen: dat Wi, om ghemeenen orbore ende groete nutscap der Poert⁽¹⁾ hebben vercocht wittelake ende redenlake onsen lieuen vrienden Joncfrouwen Yden, die wijf was wilen Huges Van Stelant, ende haren kindren, die si heuet van Hughen, die hier vorghenoemt es, vij buenre wildert die men noemt Hemede, ligghende bi der Laserien van Antwerpen, vp die beke, om ene summe van penninghen, welke penninghe Joncfrouwe Yde ende hare kindren, die hier vorghenoemt sijn, ons wale⁽²⁾ ende

(1) Poert voor Stad, gelyk men Poorters voor Burgers zeide.

(2) Wale, wel.

[p. 214]

wittelake vergouden hebben, ter poert buef⁽¹⁾ van Antwerpen, ende die Wi oec wittelake ghekeert hebben in orbore ende in nutscape der Poert van Antwerpen, alse die Port mede te vestene ende te causydene. Dese vorghenoemde wildert, die men noemt Hemede, hebbe Wi vercocht ioncfrouwen Yden ende haren kyndren, die hier vorghenoemt sijn, ende die na heme⁽²⁾ comen, in gherechten herue te hebbene ende te gebrukene, ende haren vrien wille mede te doene, elc buenre om tuaelf penningne paiments, alse ghemeenlake loept in borsen in die Poert van Antwerpen, erflake te chense elkes iaers der Poert van Antwerpen, die te gheldene ende te gheuene wittelake van ioncfrouwen Yden ende van haren kindren die hier vorghenoemt sijn, ochte van dien heme na comen selen, vp Sente Steuens dach, die comt naest den Kerstdach. Ende in dese voreghenoemde wildert, die men noemt Hemede, soe selen Wi ioncfrouwen Yden ende hare kindre die hier vorghenoemt sijn, entie na heme comen, ghestade houden,

(1) Buef, behoef, zynde de u als oe uitgesproken.

(2) Heme voor hen; zeer gemeen by de ouden.

[p. 215]

ende ghestadeghen ende guet warant wesen tieghen elken mensche. Ende om dat dit ioncfrouwen Yden ende haren kindren, die hier vorghenoemt sijn, ende den ghenen die na heme come selen vast sijn soude ende gestade, soe hebben Wi hem dese lettren ghegeuen hopen⁽¹⁾, beseghelt metten seghele van Antwerpen. Dit was ghedaen int iaer ons Heren alsmen scrijft m.cc.xc ende vij des donderdaghes na Sente Baues dach.

Wi Scepenen, Portren ende alle die ghemeente van Antwerpen, maken cont allen den ghenen, die dese lettren zien zelen ende hoeren lesen, dat Wi om groeten orbore, ende om groete nutscape der Port van Antwerpen, alse die Port mede te vestene ende te cauchidene, wittelake vercocht hebben onsen lieuen vrient Godeuarden Draken, portre in Antwerpen, xxij buenre ende 1 half buenre, ende oec lxxvij roeden wildert die men noemt Heemede, ligghende in den langhen Els binnen der vriheit van Antwerpen, eeuwelake te

(1) Hopen, open; als zynde een open brief.

[p. 216]

hebbene ende te gebrukene, alse in gherechten eyghendoeme, om ene sekere summe van penninghen, die hi Godeuart Ons, ende der Poert van Antwerpen wittelake vergouden heuet, ende die wi wittelake ghekeert hebben in dese vorseide orbore, van welker vorghenoemder wildert Wi vors. Scepenen, Portren ende ghemeente gheloven den vorseiden Godeuarden, ende sinen nacomelinghen eeuwelake tieghen elken mensche gherecht warantscap⁽¹⁾ te doene, alse in gherechten eyghendoume. In orcunscape van desen dinghen, ende in kennissen van warheiden hebben Wi dese lettren bezeghelt open met der Port zeghele van Antwerpen. Die ghegheuen waren int iaer ons Heren alsmen screef m.ccc ende twee, des disendaghes na groet vastelauont.

Wi Scepenen, Ghesworne ende al die ghemeinte ghemeenlake van Antwerpen, maken cont allen den ghenen die dese letteren sien ende hoeren lesen, dat Wi om groeten orbore ende om groete nutscap der

(1) Warantschap, of waerschap; 't zelfde als het fransche garantie.

[p. 217]

Poert van Antwerpen, alse die Poert mede te vestene ende te cauchidene, ende oec om den twist die wilen⁽¹⁾ binnen Antwerpen gheuiel, wittelake vercocht hebben gheordenden lieden, onsen lieuen vrienden onsen here den Abdt ende den conuente van den Cloestre van Sente Michiels van Antwerpen, vander ordenen van Premonstreit: xvi buenre ende xvi roeden wildert die men noemt Heemede, ligghende bi Berenscot binnen der vriheit van Antwerpen, eewelake te behoudene ende te ghebrukene, alse in gherechten eyghendoeme, om ene sekere summe van penninghen, die Ons ende der Poert van Antwerpen dese vorghenoemde onse Here die Abdt ende tconuent, wale ende wittelake vergouden hebben, ende die Wi wale ende wittelake ghekeert hebben, in orbore ende nutscape der Port van Antwerpen, alse in die orbore die hier vorghenoemt es. Van welker vorghenoemder wildert Wi vorghenoemde Scepenen, Ghesworne ende Ghemeente gheloven den vorghenoemden onsen Here den Abdt, ende den conuente ende haren nacomelinghen, eewelake tieghen

(1) Wilen, voorheên.

[p. 218]

elken mensche gherecht warantschap te doene, alse in gherechten eyghendoeme. In orcunscape van desen dinghen, ende in kennissen van warheiden hebbe Wi dese lettren beseghelt, wthanghende met der Port zeghele van Antwerpen. Die ghegeuen waren int iaer ons Heren alsmen screef m.ccc ende drie, op Sente Katelinen dach.

[p. t.o. 219]