Belgisch museum voor de Nederduitsche tael- en letterkunde en de geschiedenis des vaderlands. Deel 8

[p. 91]

Aenstelling van Bernard, heer van Borgneval, als krygsoverste der stad van Leuven,
14 february 1353 (ns. 1354).

Wi Berneere, here van Borgnevael, doen cont allen den genen die dese letteren zelen zien ende horen lesen.

Dat wi geloven ende hebben gelooft in goeder trouwen onsen lieven ende gheminden vrienden, den commongemeesters, scepenen, gesworne, ende raet der stat van Lovene, vortaen also lange alse wi leven selen hare Leytsman te sine, also dicke ende wanneer dat men ute varen sal met ghemeinen heere, ende die ghemeen stat te beleidene na onser beste, daer die stat wilt, wale ende loflec, also datter ons gheminds Heren eere in gheligghe, ende der ghemeinder stat orber ende profijt.

Voert gheloven wi ende hebben gheloeft, waert dat sake dat gheviele, dat niet ghevallen en moete, dat die stat enech ander orloge begrepe, dat der ghemeinder stat aenghinghe, ute ghesceden hare gherechten Here, dat wi dan hare dienen oec suelen ende helpen jegen die ghene daer sijt jegen begrepen, ende jegen hare hulperen.

Voert gheloven wi ende hebben gheloeft, waert dat sake dat gheviele, dat niet ghevallen en moete, dat die stat enech orloge begrepe, ocht twist, ocht discort hadde jegen iemande van onsen maghen, die ons also nae maegh waren, alse waerbi dat wi met eren jegen maegh

[p. 92]

niet doen en mochten, ende die selve maegh principael ware van sijns selfs saken jegen die stat vorscreven, dat wi dan onghehouden sullen sijn van dien dienste der stat vorscreven te doene, vorder dan een portere sijnre stat sculdech es te doene, alse van dier saken.

Voert gheloven wi ende hebben gheloeft, ware dat sake dat die stat enech ridende orloghe hadde, ocht ander orloge, waert binnen der stat te doene, ochte daer buten, dat wi dan bi hare bliven selen, ende haer Leydsman sijn also langhe alst duren sal, ende also dicke ende menechwerven alst te doene sal sijn. Ende tot alle desen geloiften vore bescreven ghelooven wi ende hebben gheloeft te doen al dat een Leydsman sculdegh es te doene, van allen stucken bi der stat te blivene, si in orlogen die si begrepen in ridende orloge binnen der stat, ocht daer buten op onsen cost; also dat ons die stat daer toe enghenen cost van teeringhen, van ons noch van onse peerden, doen en selen; sonder also vele, dat wi in onsen persoen, ende een cnape met ons, sullen moghen comen eten in der stat teinte met den Heren, ende goede lieden diere in ligghen selen, also dicke alse wi willen, ende ons ghenoeght, sonder enech wedersegghen, dats te wetene, alse men met ghemeinen heere ute ligghen sal, ende anders niet. Ende met sulcker vorwerden, ware dat sake dat gheviele op enigen tijt, dat men met ghemeinen heere ute veren soude, enech orloge begrepe, ochte ridende orloge hadden binnen der stat, ocht daer buten, ende wi ziec waren, ocht buten lands, ocht andere redelecke noetsaken hadden, dat wi selve dat heer niet en consten beleiden, alse wi sculdech ware te doene, ocht bi hen te sine in orlogen, die si begrepen in ridende orloge binnen der stat, ocht daer buten, soo sal die stat van Lovene dat laten weten tonsen huus, daer wi woenechtech sullen sijn, binnen Brabant, ende dan salt men

[p. 93]

van onsent ende op onsen cost also moeten voert bewaren, waer bi dat wi in tijts selven comen, op dat wijt metten live verreiken¹ moghen, sonder enech arghelist, die vorscreve stat te beleidenen, bi hare te sine in orlogen, die si begrepe in ridende orloghe, waert binnen der stat ocht daer buten, ocht eenen anderen goeden souffisanten man in onse stat² te settene, die der stat welgenoegen sal, ende die se wel bewaren sal, in al desen orboer die hier boven bescreven staet ende verclaert. Ende waere oec dat sake dat wi enen anderen man setten, waert in Leydsman te sine, in orlogen die si begrepen in ridenden orlogen, waert binnen der stat, ocht daer buten, ende dien, die wi der stat setten van deser saken bi hare te sine, ghelijc dat vorscreven is, ende de ghene dien wi der stat setten, der stat niet en ghenoeghde, soe soude die stat enen anderen moghen nemen ende setten, die hare welghenoegen sal. Ende waert also, dat niet ghescien en moete, dat wi des niet en daden alse vorscreven es, ende die stat daer af cost hadde ochte scade, alse enen Leydsman te miedene³, waert in orloghen, die si begrepen in ridenden orloghen, waert binnen der stat, ochte daer buten, dat wi die coste ende scaden ghelijck ende al op souden richten ende ghelden, sonder enech weder seggen. Ende kennen dat wi ende al onse goet tot allen desen vorscreven gheloften ende vorwerden sijn verbonden, over mits twee hondert ouder scilde, ochte alsulken scilde, goed ende ghave, daer die stat ghemeinlec mede betaelt jaerlex diese lijftocht sculdech es, ende diese onsen live gheloeft hebben te gheven ende te betalen, die ene helft hier af te sente Jans messen

1 Verreiken, bereiken.

2 Stat, plaets.

3 Te miedene, te huren.

[p. 94]

Baptisten, in midde zomer ende die ander helft te Kersavonde, also lange alse wi leven selen ende niet langer; ende daer si ons af hebben gegeven goede letteren ende vorwerden, besegelt met den groten segelle van haerre stat vorscreven: met dier vorwerden ende conditien, dat wi die twee hondert scilde vorscreven ons, overmids hen tonsen live geloeft ende besegelt, niet vercopen en selen mogen, veranderen, noch versetten, also lange alse wi leven selen, in eneger manieren. Ende alle dese vorscreven geloeften ende vorwerden gheloven wi der stat vorscreven, ende hebben ghelooft bi onser trouwen, sekerheit, ende eede te houdene ende te voldoene, wale, lofleke, nae onse beste, also lange als wi leven selen, in alle dier manieren ende vormen, gelijc dat hier boven bescreven staet ende vercleert, ende daer jegen nemmermeer te doene, noch te sueken enegerhande weghe, daer die stat van desen gheloeften gheheelec ende al te male belet mochte werden, alle arghelist uten ghesceeden.

In orcontscapen van allen dese vorscreven dinghen ende gheloeften, soe hebben wi Berneere, Here van Borngeval vorscreven, dese letteren besegelt met onsen segelle, in kennissen der waerheit. Ende omme dien meerdere sekerheit hier af te doene, soe hebben wi ghebeden ende bidden eersame lieden ende bescheedene die scepenen van Lovene ghemeinleke, die nu scepenen sijn, dat si dit op ons willen dragen, ende met ons besegelen, dats te wetene, Janne van der Calstren, Janne vanden Grate, Janne Hers, Hertelief Puse, Roelof van Reedinghen, Jan Coutereel, ende Vranke Edelheer den jongen. Ende wi Jan van der Calstren, Jan van den Grate, Jan Hers, Hertelief Puse, Roelof van Reedinghen, Jan Coutereel, ende Vranke Edelhere de jonghe, scepenen binnen Lovene, overmids beede ende verzuec sHeren van Borngeval vorscreven, soe hebben wi dese letteren met

[p. 95]

hem besegelt ende onse segelle hier aen gehangen; ende die gheloeften op hem ghedraghen. In oirconscape ende in kennissen der waerheit ghescreven ende gedaen op den veertiensten dach van der maent van Februario, int jaer ons Heren alse men screef MCCC viftich ende drie.

Gekopieerd uit het oud Charterboek der stad Leuven, berustende ter Archieven aldaer.

J.F. WILLEMS.