Nieu liedt-boeck ghenaemt Der minnaers harten jacht ofte de Groote Aemstelredamsche rommelzoo

[Vriendelick ooghen]

Voys: O schoonste Personage.

VRiendelick ooghen
Sijn seer seltsam, en dubbelt van vermeugen:
Sy doen mijn smert ghedoghen,
En wederom heel hartelijck verheughen,
Wanneer als ghy
V ooghjens bly
My toe schiet van der syen,
Dan can ick voelen
Myn hart cryiekend' woelen,
Doort verblyden.

Maer als ghy die gaet stueren

Wt lust, of vrees, afkerich tot een ander:
En veynst voor u ghebueren
Of ghy niet saegt hoe treurich dat ick wander
Laes dan tuyght myn
Bedroef aenschijn
Myn heymelijcke smarte,
Die ick by vlaeghen
Soo gantsch vermont moet draghen
In mijn herte.

Als ghy my laest ghemoeten

Kost ick van vreucht mijn wesen niet bedwinghen
In plaets van u te groeten,
Begost myn tong van blyschap schier te singhen:
Ick hadt dien tijdt
Soo harden strijt,
Ick dorst u niet aenranden,
Myn hart met lusteb
Soo seer smaeckmondent kusten, Uwe handen.

V Kars blos roode lippen

Ontsloot ghy lief soo Lieffelijck t'was wonder
Ick sach u oock ontslippen
De soete gunst, die daer noch schuylden onder
V goede luym
Myn plomp versuymt,
Doet my in myn selfs praeten
Wrocken en eerkauwen!
Die gaet myn siel benauwen
Wter maten.