Nieu liedt-boeck ghenaemt Der minnaers harten jacht ofte de Groote Aemstelredamsche rommelzoo

[p. 30]

[Iuffrou, als ick u deught, u hooghe gaven]

Op de stemme: La Roiale.

IUffrou, als ick u deught, u hooghe gaven,
V zoet ghesicht, u jeught, u vreught, u aerdigheyt,
t'Vernust dat in u heeft Natuer begraven,
De heusheyt van u lieflijcke mewaerdigheyt,
V leden, u zeden, u reden aenmerck,
Zie ick Naturaes wonderwerck.

My docht doen my onlanghs de eer gheschieden

Dat ghy met my ginght zingende deur t'groene wout,
Dat ick al het gheboomt u eer zagh bieden,
En duycken ned'righ met haer tackjes nat bedouwt:
Duyckt boomtjes, duyckt (docht ick) altemael,
Na t'zinghen van desen Nachtegael.

Mijn gheest was in gheneught gantsch opgetogen,

Mijn ziel, mijn zinnen vloghen vrolijck uyt en in,
Na dat ghy uwe stemme woud verhooghen,
Of dalen, of drayen, of neurien na u zoete zin
Ick dachte, wat is een Koninghs pracht
By zulcken wellust waert gheacht?

Och dat my het ghelucki soo wou verblijen

Dat ick altijt ghemeten mocht u by-sijns vreught,
Ick zou Keyser noch Prins zijn rijck benijen,
Maer achten my gheluckigher door mijn gheneught,
Als Keyser, als Konin gh, Prins of Heer,
Ick kies t'ghenoeghen voor de eer.

Maer laes: schoone, het scheyden is voor de deur,

Ghy treckt van hier, ghy voert met u u vromigheyt,
En laet my u af-zijn met rouw betreuren:
Maer of ghy schoon Goddin lichaemlijc van my scheyd
V beeld ghy in mijn harte laet,
Mijn gonste volght u waer ghy gaet.

FINIS.