Nieu liedt-boeck ghenaemt Der minnaers harten jacht ofte de Groote Aemstelredamsche rommelzoo

[p. 23]

Bruylofts-Liedeken,

Op de Wijse: Vaert wel Scepter vaert wel.

EEr oyt de werelt wist vant snoodt bedroch der sonden
Doen tquaet en quaetdoenders noch niet en was bekent,
Doen ramp en ongeluck gheketent lach ghebonden,
En goetheyts wesen was de schijn altijts ontrent.

Doen d'Aertrijck jeudich noch van selfs gaf alle dinghen,

Volmaect, en datmen niet gebreckelijck en vant,
Doen lustent u O God de Echt int licht te bringhen,
En hebt diens lustich hof vol alle goet gheplant.

V zeghen gaeft ghy die, die eerst de Echt begonnen,

Geeft die haer volgen naer, u zeghen oock te sien,
En soo oyt yemant heeft ter werelt mercken connen
Dat u de Echt behaecht, soo latet nu gheschien.

V gaven milden Godt wilt dees ghelieven gonnen,

Lichaems gesontheyt, en gerystheyt aent ghemoet,
Voorspoet en Salicheyt, en watmen soude konnen
Wenschlijck begeeren, sent haer toe in overvloet.

So al dit goet of meer u mochten zijn ghegheven,

Gheliefde Paer, soo wil u gheven noch de Heer,
Matich die danckbaerlijck tontfanghen, dat u leven
V selfs sy nut, en and're dienen mach tot leer.

EYNDE.