t'Vermaeck der jeught

[p. 137]

Liedt, Waer in t’samen-spreken Coridon een Herder, en Silvia Een Nymphe.

Op de wijse: De liefde lust int herte baert,

AY Lodderlijcke Silvia,
Wat siedy dus rontomme?
A Coridon, gh’en weet waer na,
Vijf Schapen zijn my nomen.
Silvia com// siet niet meer om,
T’Verby sal niet meer comen.

Ia Coridon, daer water was,

Daer comt wel water weder,
En op het oud’ ijs frieset ras,
De wulpse liefd’ is teder.
Ay Coridon// schuylt voor de son,
En sit wat by my neder.

Ay Lockachtighe Silvia,

Hoe condy d’Herders vleyen,
Dat al haer schaepkens voor en na
Dwalen in vreemde weyen.
Ay Silvia// let op de scha,
Wie salse tavont scheyen?

Ay sinnelijcke Coridon,

Coridon soet van tale,
k’Wou dat ick ooc so veynsen con,
Ghy jocket al temale.
Coridon stil// t’is wel u wel,
Laet vry de schaepkens dwale.

Laetse vry dwalen gins en weer,

men salse toch niet vanghen:
Wy dienen beyd’ al eenen heer,
Dach en weeck even langhe,
Silvias min// is Coningin,
Waer nae d’Herders verlanghen.

Ghy Coridon, met u ghedicht,

Betovert d’Herder-innen.

[p. 138]

 

Ghy Silvia met u ghesicht,

 

Betovert d’Herders sinnen.

 

Dat Coridon// Silvia won,

 

Waer soud’men d’oorsaec vinden.

 

 

 

Die Coridon heel Spaenjen gaf,

 

Silvia Vranckrijcx Croone,

 

Hy reuylde niet zijn Herders staf,

 

Noch sy haer boemkens schoone,

 

Waer med’ hy wou// en sy hem sou

 

Cronen, en hy haer loone.

 

 

 

Nu dertel Herderin, betaelt

 

De schaepkens menich-vuldich,

 

Die ghy my inde Lenten staelt.

 

Wel Herder onverduldich.

 

O, Herder stout// spreeckt niet soo bout,

 

Ick ben u niet veel schuldich.

 

 

 

Mocht Silvia met Coridon,

 

Des Hemels loop besturen,

 

Sy maeckten driemael middach son,

 

In vieren-twintich uren.

 

Silvia com// morghen weerom,

 

Wie weet hoe langh t’sal dueren.

 

 

 

t’Wort laet besorghde Coridon,

 

Wildy het Vee niet scheyden?

 

Ay schaepkens lief, ay spade son,

 

Wilt noch een luttel beyden.

 

Ay Coridon// t’schuyllen voor son,

 

Can u dat soo verleyden.

 

 

 

De schaepkens inde weyde spa,

 

Is wis der wolven proye:

 

Gaet thuis ghevoede schaepkens dra,

 

Gaet thuys waert t’uwer Coye,

 

Coridon blent// Silvia kent

 

Gheen Lammeken voor een oye.

T' EYNDE.