t'Vermaeck der jeught

Herder-Liedt

Op de voys: O ghy stercke Godt der minnen

Met Muses hulp, singht Damon hier een liet,
Op hoop, hy sal zijn Nymphe soo beweeghen:
Hoop heeft hy wel: maer troost en crijcht hy niet,
Dies men hem siet, tot sterven zijn gheneeghen.

 

 

Comt nu al gesangs Godinnen,
Met u soete stem en clanck,
Helpt my singen eenen sanck,

[p. 131]

 

Om mijn Nymphes jonst te winnen,

 

Waer door dat mijn swaer ghesucht

 

Mocht van my nemen de vlucht.

 

 

 

O ghy schoonste der Najaden

 

Verhoort toch mijn droev clacht,

 

Eer ick in de brandt versmacht,

 

Soo bewijst my u ghenaden,

 

Dan sal al mijn swaer ghesucht

 

Van my haest nemen de vlucht.

 

 

 

Ghelijck Plutoos heete poelen

 

Branden sonder grondt of ent:

 

Soo doet oock mijn swaer torment.

 

Maer mocht ick dees brant eens coelen,

 

Soo sou al mijn swaer ghesucht

 

Van my haest nemen de vlucht.

 

 

 

Oft ick schoon naer mijn believen

 

Vyt dronck Hebri coude vloet,

 

Soo soud’ ick dees heete gloet

 

Vyt my niet connen verdrieven,

 

Waer door dat mijn swaer ghesucht,

 

Mocht van my nemen de vlucht.

 

 

 

Maer mocht ick eens naer mijn lusten,

 

(En oock naer mijn Nymphes Danck)
In haer sachte armen blanck,

 

Eenen halven nacht eens rusten,

 

So sou al mijn swaer ghesucht

 

Van my haest nemen de vlucht.

 

 

 

Nymphe laet u toch beweghen,

 

So sal met my Berch en dal

 

Maken een seer bly geschal,

 

Dat Echo sal roepen teghen,

 

Waer door dat mijn swaer ghesucht

 

Sal van my nemen de vlucht.

 

 

 

Maer sal my u hulp nu valen,

 

Soo moet ick sterven ter-stont,

 

En waer men min doot permont

 

Sal men u wreetheyt verhalen,

[p. 132]

 

Waer door dat mijn swaer ghesucht

 

Sal tot u nemen de vlucht.

Verkiest het Beste.

O Nymphe dan: ick stervend’, wilt mijn leven
(Als t’laetste gift, dat ick u nu sal gheven)
Aen nemen doch van dijn Damon in danck:
Hier mee eynt beyd’ mijn leven, en mijn sanck.
O minnaers al, hout toch (ist u vermoghen)
Mijn trouwe liefd’, en haer wreetheyt voor ooghen.