t'Vermaeck der jeught

Liedt.

Op de wijse: Brande Betaali.

GHelijck een Casteele,
t’Wellick int gheheele
Rontom met bolwercken, vastelick ghebout,
Teghen zijn vyanden,
Comend’ uyt alle landen,
Hem allenich op zijne sterckheyt vertrout,
En triumpheert// met zijn banieren,
En vendels weert// niet om vercieren,
Sonder alle vreese van dangieren,
Tot verachten// van de crachten
Zijner vyant.

Soo was al mijn wesen

Gheheel sonder vresen,
Eer ick mijn jonck herteken beleghert sach,
Met alle die heyr crachten,
Van Cupidoos machten,
Die niemant ter werelt wederstaen en mach.
Haer deughden goet// dat waren haer knechten.
Haer wesen soet// t’gheweer om vechten.
Door haer schoonheyt sy vendels oprechten.
Haer slachoorden// stond’ in oorden
Seer trumphant.

t’Lieffelick aenschouwen,

Van dees bloem der vrouwen,
Waren haer kartouwen, en grof gheschut,
Waer mede dat sy velde
Alle mijn ghewelde,
Van mijn bolwercken, en mueren heel onnut.
Het soet gheclanck// van mijns liefs woorden,
d’Alarum sanck// die ick daer hoorden,
Om op my te doen een storm sy sproorden
Maer eylacy// k’bad om gracy
Ende accoort.

Ick wil al opgheven

Mijn lijf, goet, en leven,
O Princesse lief, en stellent u te pant,
Sonder u te setten
Maten, ofte wetten,
Ghy hebt de victori, en de overhant.
Wt g’nade goet// wilt wy salveren,
k’Sal metter spoet, u lof vermeren,
Door u goetheyt vol alder eeren,
Sal ick prysen// en bewysen
V eer en deught.