Beschryuinghe vande Bleeckezijt ende Calmerzont, t'welck het beginsel van Sweden is.
INden eersten soo isser een hauen in Eertholmen diep vier vadem, ende die van Sandwijck (dat op Bortholm leyt) naer Ahuys zeylen wil, die sal aengaen tot Hano noorden ten westen, ende is een ront Eylant, rontsomme goet anckergrondt, ende is van daer tot Ahuys noordt noordtwest, ende leyt op een af waterken. De handelinghe is daer van alderley Vette-waer, Mout ende Garste.
Item om vant noorteynde van Bortholm te zeylen naer Calmer, die sal van Bortholm na der Clippen gaen noordt noordtoost, ende is veerthien mylen, ende van daer streckt de Calmer eerst in noorden, ende noorden ten westen: ende alsmen binnen t'Riff van zuyder noorden is, soo streckt Calmerzont noorden ten oosten in tot Calmer toe, tot datmen door het nauwe vande clippen is die voor Calmer legghen: Ende van daer streckt de Calmerzont tot die Zweetsche Jonckfrou noordt noordtoost, ende noorden ten oosten. Zuyder noorden leyt vant zuydteynde van Oelandt af wel anderhalf mijl in Zee, ende is een vuyl riff, streckende vant landt zuyden ten westen, ende tis inde vaerwech vant zuydteynde van Oelandt diep achtentwintich ende eenendertich vadem, ende dat ontrent dry mylen vant landt. Oelant is lanck ende smal, ende heeft achtien plompe toornen.
Wt dit voorsz. Calmer, ende die omligghende contreyen comt Zet Zweets Teer, alderley Pelterye, Eelantsche ende soute Huyden, Bocken ende Zeghen vellen, verscheyden Vette waer, doch weynich Coper ende Yser.
Auteursrechtelijk beschermd
