Spiegel der zeevaert

Om den boghe op diueersche zuydtsterren te teeckenen.

SOo salmen inden eersten by den Wachter vernemen wat Sterren int Zuyden comen, te weten Canis maior die ghemeyne Zuydtsterre, staende ouer de Zuytsyde vanden Equinoctiael xvi. graden, van welcke graden ghy v beghinne nemen sult, ende maken dat t'halue cruyce, ende het ondereynde vanden stock net op den xvi. graet raecke, daer van af teeckenende tot den eersten graet vande linie Equinoctiael, ende daer nae beghinnende opwaerts te teeckenen veruolghende tot den eynde vanden stocke, alsoo men hier perfectelijck int midden van desen teghen-ouerstaende instrumente beschouwen mach. Item soo ghy een ander Sterre die Zuyderlicker ware van xx. oft xxv. graden begheerde wt te teeckenen, soude alsdan moeten beginnen vande xx. oft xxv. graden na den Equinoctiael, en de voorts Noordtwaerts tot het eynde van uwen stock, in maniere bouen verhaelt. Ende soo yemant begheerde wt te teeckenen eenighe Sterren by Noorden den Equinoctiael, t'sy dan de rechte oft slincke schouder vanden Reuse, die door den Meridionael Circule gaen op ses ende een half, ende vijf graden, soo sult ghy van die graden v beghinne nemen, ende soudt van daer moeten toe doen ses graden ende een half, ende vijf graden na den eersten graet vanden Equinoctiael, ende maken dattet halue cruys ende het onder eynde van uwen stocke niet verder en raecke dan totten Equinoctiael linie, hoe wel v beghin hoogher ende Noordelijcker is. Aldus machmen de stocke oft graetboghe volmaecken, ende teeckenen op alle soorten van ghesternten, soo men hier sien mach.