Maniere om alderley graetboghen te teeckenen.
EErst omme der Sonnen ende Noordtsterren Graetboghe te maken, salmen trecken een ronde Circkel, diemen aen de buyten cant aen ghelijcke ghedeelten sullen af passen oft af steken, sulcx dattet een quadrant oft vierde paert niet grooter sal sijn als d'ander, ende sullen alsdan een cruys recht int midden door trecken latende d'onderstreeck verre nederwaert gaen om te beteeckenen de graedt-stocke, t'selfde ghedaen sijnde salmen de twee onderste deelen vande Quadranten aen neghenen af steken oft verdeelen, t'welck beduyden sal elcx t'neghentich graden, diemen daer nae wederom ghelijckelijck aen tween stellen sal, op datse in vyuen aen enckele graden verdeelt mach worden, d' een niet grooter sijnde als d'ander. Ende sult op elcke syde vande voorscreven ronde Circule twee linien nederwaerts trecken (diemen beneden euen verre vande langhe linie, wt het midden comende setten sal) gelijcke mate voeren, soo datse onder ende bouen int ronde euen verre vanden anderen staen, om datse niet slim oft scheluwe loopen en sullen. Ende daer nae salmen linien trecken wt het opperste poinct vande voornoemde ronde Circule nedergaende: op den eersten oft t'neghentichsten graet, datse aen de binnen cante de rechte linie aenroere. Soo veruolghende met alle d'ander graden als by den instrumente hier voor ooghen claerlijck blijct: soo verre als v stock lenghen mach, ende sult alsdan v schuyue oft cruyce net soo lanck maken, als de vier quadranten wijt zijn, dattet come midden op de sticken van d'eerste graden.
Item oft yemant sijn schuyue oft cruyce soude willen vergrooten, sal moeten de sijdlinie soo veel verder wtsetten, als hy sijn cruys oft schuyue soude begheeren grooter te maken, treckende alsdan de graet linien (spruytende wt het poinct vande ronde Circule) soo veel langher datse aen de sijdlinie geraken. Voorts veruolghende de maniere bouen verclaert. De schuyue oft t'cruys sal altijt lanck wesen dattet rake vande t'sestich tot de dertich graden, sulcx datmen de graden buyten beyde eynden van t'cruys sal moghen sien, te weten van die Sonne ende Noortsters-boghe.
Auteursrechtelijk beschermd