Beschryuinghe ende verclaringe hoemen metten sterren die ontrent d' equinoctiael lune, door den meridionael circule drayende zijn, handelen sullen omme de hoochde des pools te weten.
TEn eersten sullen wy segghen van Alhabor oft de ghemeyne Zuydtsterre, welcke gaet ouer de zuytsyde vanden Equinoctiael xvj. graden, om daer by de hoochde des Pools te nemen, so salmen de voorsz. graden ende minuten af trecken van v ghenomen hoochde, soo hebt ghy alsdan de Eleuatie oft hoochde des Pools.
Om de hoochde vande Sterre staende inde rechte schouder des Reus te nemen, die sal ses graden ende een half moeten toedoen, die sy bouen ende by Noorden den Equinoctiael gaet. Desghelijcx om de hoochde te nemen by de rechter voet des selfs Reuse, gaende x. graden by Zuyden den Equinoctiael, sal de selue graden vande ghenomen hoochde aftrecken. Van ghelijcke salmen vande opperste vande dry Coningen oft de Wapen-rieme vanden Reuse, gaende eenen graet by zuyden den Equinoctiael, de selfde graet moeten aftrecken, soo hebt ghy de rechte hoochde des Pools. In sulcker voegen salmen de hoochde moghen nemen, van allen andere Sterren haren ganck hebbende ontrent den Equinoctiael: midts daer eerst ende al voren van versekert te sijn, hoe veel graden ende minuten de selue Sterren by Zuyden oft by Noorden des voorsz. Equinoctiael gaende sijn. Ist dat sy by Zuyden sijn, salmen de graden vande ghenomen hoochde aftrecken, ende by Noorden gaende salmen de selue graden adderen oft toedoen: Al t'selue metter Sonnen boghe, oft andere instrumenten int Zuyden haer ghebruyck hebbende.
Dit selfde machmen oock doen met bekende Sterren, gaende om t'Noorden den Pole aldernaest sijnde, alsoo die tweemael int Etmael oft om de xxiiij. vren inde Meridionael linie comen onder en bouen de Pole, salmen de seluighe tweemael moghen gebruycken als den tijt sulcx eysschende is. By exempel ick neme de middelste Sterre vande Wachters, gaende ouer de Noortzijde vanden Equinoctiael lxxv. graden ende xl. minuten, comende onder ende bouen den Pole xiiij. graden ende xx. minuten. Soo sult ghy, ist dat de Sterre bouen de Pole is, tot de ghenomen hoochde de voorsz. xiiij. graden ende xx. minuten moeten toedoen. Ende onder den Pole comende, sult ghy de selue graden ende minuten moeten aftrecken: alsdan hebt ghy de gherechte hoochde vande Pole, desghelijcken machmen doen mette Sterren vanden grooten Beere, die veel in t'ghetal sijn, midts datmen wel versekert sal sijn hoe veel graden ende minuten die bouen oft beneden die Pole gaende sijn, ist datse bouen de Pole is sult de graden die sy bouen de Pole gaet toedoen, ende daer onder gaende sult soo veel graden aftrecken, dit al van v ghenomen hoochde, met de Noordtsterren boghe oft andere instrumenten daer toe dienende: also veruolghende met alle die andere Sterren die nut ende bequaem sijn ter Zee te ghebruycken.
Auteursrechtelijk beschermd