Vermaninghe tot alle ionghe zeevarende luyden, yuerich zijnde om yet te leeren.
OMme perfectelijck tot de conste ende wetenschappe der Zeevaert te gheraken. Is de principaelste middele, dat soo wanneer een Stuerman oft Bootsghesel, wt eenighe Landen, Riuieren oft Hauenen zeylen wil, sal wel scherpelijck moeten letten, wat ghebouw, Sloten, Toornen, Kercken, bekende Berghen, Duynen, Molens oft andere mercken daer op staen. Ende alle t'selfde alst nu een kenninghe van u begint te legghen, mette penne ontwerpen oft contrefaicten, ende dit op sekere ende ghewisse streken vanden Compasse, so ghy daer wt ende van gheuaren zijt, ter wijlen ghy noch bescheydelijck bemercken moecht al datter op t'landt staet, omme die ghedaente te beter te treffen, dickwils t'loot gebruyckende op dat ghy perfectelijck in uwe memorialen aenteeckenen moecht, hoe wijt alle ondiepten buytens lants streckende zijn. Van ghelijcken salmen doen int ontdecken ende aencomen van andere Landen, alsmen ooghschijnelijck bemercken can de ghedaente vant selue, t'sy dan hooch oft leech met alle d'opstaende mercken, ende verghelijcken dat met desen onsen tegenwoordighen Caert-boeck. Welck Landt alsoo int gheheel oft deel bekent zijnde, salmen voorsichtelijck ondersoecken, omme bij ghewisse mercken, toornen, Kercken oft Capen (die meest by alle hauenen, gaten ende wthoecken beuonden werden) omme t'rechte Diep ende Kille aen te soecken ende te treffen, oock neerstelijck te letten op de inzeylinge, insghelijcx als ghy van daer wederom wtzeylt. Dit yuerich ende met goede coragie aengrypende sal yeder vernuftich Bootsman wel tot goede kundtschap ende kennisse der Zeevaert gheraecken. Want dat een man oft ionck gheselle selfs aenveert, by der hant neemt ende aenteeckent sal hem langher by blyuen dan of hijt van anderen geleert hadde: Sal daeromme niet nae laten, oft hem eenichsins schamen aen den Stuerman oft andere bedreuen luyden op den schepe, dickmaels te vraghen de gheleghentheyt der Landen, Diepten, Streckinghen, Eleuatie oft hoochde des Pools. Ende daer toe oock ghebruycken der Sonnen Graetboghe ende d'Astrolabie, welck de twee oorbaerlicste instrumenten zijn (wtghesondert het Compasse) diemen ter Zee tot versekeringhe ende kennisse der Zeevaert is ghebruyckende. Is daeromme dit onderwijs hier alleenlick ghestelt tot voorderinghe ende behulp vanden ionghen onbedreuenen aencomende Bootsgesellen, yuerich sijnde om yet te leeren.
Auteursrechtelijk beschermd