andere vermakelicke ende wonderbaerlicke Zeevarende zaecken (buytens landts streckende) int progres deses Boecks ooghenschijnlick openbaren, bewysende die principaelste hauenen ende stromen onser nauigatien ende traficquen, daer wt alle vrome luyden, van wat qualiteyt die zijn, ter Zee handelende sullen moghen beschouwen, ende vermercken die plaetsen huerlieder handelinghe. Ende so eenich ongeval van Scheepsbrekinghe (dat Godt betert vele ghebeurt) geleden werde, De Coopluyden asseuereerders ende dierghelijcken te lichtelijcker, sullen mogen oordeelen van alsulcken sneuvel ende ongheluck, siende door desen Ontwerp, de streckinge vande landen, hoecken, ondiepten, clippen, etc. daer sulcken ongheual gheschiet is. Sal v Vorstelicke Ghenade hier mede oock beuinden, de wonderbaerlicke wercken, die den Almogenden Godt, op ende in, de Zee stromen, beneffens, ende lancx alle Custen, Hauenen, Clippen ende Riuieren geschapen heeft. Ende tot sommige plaetsen zeer wijt in Zee, daer die waterbaren, golfen ende dyningen (met schoon weder) in, ende tegens den anderen also loopen ende rauelen, dat daer dore vele schepen, metten volcke om lijff ende goet ghecomen zijn, behaluen dat den Zee-varenden man van Godes weder, door tempeeste, storm ende windt, noch is opcomende: De principaelste plaetse daer sulcx gheschiet, is wel de voornaemste ende periculooste, de Maelstrome, Welle, oft Slorpe, ghenaemt Mouske stroom, ghelegen achter Noorweghen op de 68. graden aen de Noortzijde van een Eylandt oft Clippe, die men noemt Weeroy. Dese Welle trectet water mette vloet, t' gheheele ghetye, te weten den tijt van ses uyren so geweldelick innewaerts, met alsulcken gedruys, drayinghe, getumel, vallinge van baren ende stromen, datter meer is van te verwonderen dan te schryuen, in sulcker voeghen, datter in dien tijt, streckende meer dan twee mylen weechs rontsomme de Clippe van Mouske (daer t'water mede onder door gaet) gheene schepen en mogen genaecken, oft souden met groot pericule daer inne verleyt werden. Ende ten tyde vande Ebbe, wertet water daer teghens wederomme so crachtelick opwaerts gheworpen, datter gheene materialen (hoe sware die oock zijn) te gronde moghen gaen. Sulcx dat de Noortsche vischers, tot dien tyde, met hare Jollen ofte vischbootkens, zeer vele diversche ende vremde formen van vischen (alleenlick met haecken bequamelick daer toe ghemaect zijnde) in hare schuyten halen ende lichtelicken vanghen, wantse alsdan ganschelick niet onder water ende te gronde konnen gheraken. Ende vermoeden de Noorluijden de Clippen daer ontrent bewoonende, dese strome neder een deel van Noorweghen (tot opte Noortbodem in Oost Finlandt) door te gaen ende te strecken, oorsaecke, dat ter seluer plaetse mede een Maelstrome beuonden werdt, maer niet so gheweldich ofte periculoos, daermen ghelijcke vischen vangt, als onder oft ontrent de Clippe van Mouske, ende t' water mede zout is. Waer dore de selue Slorpe, bij vele eruarene Piloten ghenaemt wert de Nauel der Zee, causerende de Ebben ende vloeden alle de Landen (aen dese Noortzyde vanden Equinoctiael) omme loopende, als bequamelick daer toe ghelegen zijnde, omme de wateren Zuyden, Noorden, Oost, ende West, door alle de Zeen te verspreyen; Te weten Noortwaerts naer den
Auteursrechtelijk beschermd