Het beleg van Gent ten jare 965

Hoe datter een meuterie uprees ten tyde van den grave Aernaut.

Een meuterie rees te Curtrycke curts daerna uppe, dat was de weverie ende volderie jeghens die van Haerelbeke om dat die van Haerelbeke beter neerynghe hadden ende oock dat den seghel van Haerelbeke beter onder den coopman bekent was dan den seghel van Curterijcke. Omme het welcke de weverie ende de volderie van Curterijcke sloten dat sy Haerelbeke heymelic souden verbranden, den eersten saterdach alsdoen naestcommende. Dies den heleghen sant Sinte Beertolf rus-

[p. 37]

tende was tot Haerelbeke van dese toecomende plagen waerschuwende was die lieden van Haerrelbeke, ende gaf de borghers een teecken van cloppen, ende clopte binnen der selver weke so vervaerlick dat den pastuer ter dier causen naer Ghent quam ende gaf 't den grave Aernaut te kennen dat hy so vreeselic gheclopt hadde, daerup den grave seyde jeghens de gravinne Rosula waerome Sinte Beertolf so vreeselic gheclopt hadde, dat een helich man ende sant was, die sijn bloet ghesturt hadde om den name des Heeren, die hier voortijts van de Hunnen, nu Hongersche ghedoot es gheweest, welcke Hunnen mijn groot vadere hier uut Vlaendren ghejaecht heeft, daeromme gaf hem den paus alle thienden, ende hy ordineerde xij provengieren, dat sijn, huusen om den aermen proven te gheven; in Brughe stelde hy xij cannuncken ende gaf hemlieden oock thienden, hy regneerde xxxviij jaren, ende hy overleet in 't jaer Ons Heeren ix^c. ende lvij ende licht begraven in 't clooster van Blandijn nu Sint Pieters. Den selven Aernaut-de-Groote brachte den heleghen sant Sinte Beertolf in Vlaendren, dewelcke ons gheeft te kennen met cloppen als den lande van Vlaendren ofte de stede daer sijn ghebeente es rustende eenich teghenspoet nakende es.