Hoe dat den grave elcke hooftstad, als Ghendt , Brugghe ende Ypere, elc een wapen gheeft.
Het welcke ghedaen sijnde so heeft den grave ontboden de regierders van Brugghe ende Ypere, ende gaf elcke stad een wapen. Aldereerst so gaf den grave Aernaut de hooftstad van Ghend de wapen te voeren eenen witten leeu in 't swart velt, de stede van Brugghe den leeu van assuere in 't ghelue velt ende van selveren baren staende, beteeckenende dat de stede van Brugghe saude commen van der see, maer den leeu ramperant saude de vlaemsche warande beschudden jeghens hare vianden, daeromme stont hy rampant, wilt ende onghebonden; ende de stede van Ypere gaf hy een dobbel cruce, ende eenen bonten mantel dat sy Vlaendren bedecken soude cruuswijs jeghens hare vianden, daeraf dese dry steden van Vlaendren elc bysondere den grave seer bedanckende waren ende elc es t' huuswaert met sijnder wapen ghereyst.
Auteursrechtvrij