Het beleg van Gent ten jare 965

Hoe den heere van Dixmude als ruwaert van Vlaendren overgeeft alle de steden in Vlaendren den conynck van Vrancrijck.

Volghende den raet van den Gandoysen so es den voornoemde heere van Dixmude comen by den conynck van Vrancrijck, ende es hem te voete ghevallen, hem vriendelick groetende, segghende ende bad dat hy sijn ooghen van gracien slaen wilde up sijn schamele volc, hem overghevende in handen alle sloten ende casteelen ende alle steden in Vlaendren, uutghenomen de stede van Ghendt, daer ic gheen macht over en hebbe, want sy buten mynen regimente staet, dier den conynck hem metter presentacien van den heere van Dixmude, als ruwaert van Vlaendren te vrede was, maer den conync seyde wilde de stede van Ghendt jeghens hem upstaen hy soudese doen raseren, insghelijcx so seyden ooc die ij andere conynghen, ende quamen alsoo eendrachtelick metter artylgerie, letter alsdoen vant, ende metter carroye naer de stede van Ghendt, dewelcke sy seer wel beset vonden met schilden, veendelen, standaerden, bannieren ende artylgerie ende veel volcx ter mueren, al offer niet dan troyaensche

[p. 10]

ende romanische edelmannen en hadden binnen gheweest, waeraf de dry conynghen seer verwondert waren ende begheerden naerdere te commen ende sonden huerlier trompylge op vryheden ende saulfconduut, dwelcke hemlieden was gheconsenteert, ende als dese dry conynghen by der stad quamen soo dat se alle de wapenen ende bannieren wel sien mochten so seyden dese iij conynghen dat men huerlieder segghen ende vertellen soude wie alle wapenen ende bannieren toebehoorde.