Het beleg van Gent ten jare 965

Hoe de iij conynghen met veele graven ende hertogen arriveren, ende den raed van den Gandoysen.

Naer dat den grave Aernaut vertrocken was so es den conynck van Vranckerycke, den conynck van Inghelant, den conynck van Scotlant met veele hertoghen ende graven, als den grave van Ponteu, ende den grave van Normandien, ende veel andere in Vlaenderen ghecomen, dwelcke den heere van Dixmude als ruwaert van Vlaendren vernomen heeft, die den grave Aernaut ghestelt hadde t'synen vertrecke, seyde totten burchgrave als dat de drye conynghen met al huerlieder macht up Vlaendren quamen, als Vranckerycke, Inghelant ende Scotlant, dies hy van den burchgrave raet begheerden te hebben, hoedat sy het lant bewaren souden ter minster schade; daer up Gheeraert van Ghend seyde: ‘Laet

[p. 8]

ons trecken by den gheslachten, hoe wy metter oorloghe jeghens de macht van de drye conynghen maken willen, want 't en es in ons macht niet sonder wysen raet de dry conynghen te wederstane.’ Mids welcken den voornoemde ruwaert ende den burchgrave van Ghendt quamen tot by den gheslachte, denwelcken den raet gaven dat Gheeraert van Ghend als huerlieder medebroeder soude blyven in de stadt, maer dat den heere van Dixmude als ruwaert van Vlaendren trecken soude by den conynck van Vranckerijcke als souvereyne heere, ende dat hy overgheven soude alle de steden van Vlaendren, uutghenomen de stede van Ghendt, daer hy gheen macht over en hadde, ghemeerct dat die stede gheregiert es ende ghegouverneert es, ende gheen verbot over haer en hebbe, ende segghen indien sy ter obediencie niet commen en wilde men soude se lichtelick daertoe dwynghen, ghemeerct dat sy de macht niet en hebben de macht van de dry coninghen te wederstane, denwelcken raet den heere van Dixmude goet dochte ende hy consenteerde dat men alsoo doen soude ten fyne dat het lant van Vlaendren niet en soude ghepilgiert werden ofte ghedestrueert worden, dies de voornoemde gheslachten ende den burchgrave van Ghendt hebben bevolen dat men het graen van alle canten naer Ghendt brynghen soude, ende dat men de stad fortifieren ende steerck maken soude, ende wel voorsien soude van als dat moghelick ware, dus hebben sy de stad van Ghent ghefortifiert ende steerck ghemaect, ende van als seer wel voorsien, ende hebben inghehaelt ende doen inhalen victaelge ende amonicie van oorloghe van alle het ghene dat hemlieden van noode ende behouven soude om vij jaren ofte meer om de oorloghe te hauden, ende die van Ghendt hebben haerlieder scilden, wapenen, veendelen, standaerden ende bannieren ter

[p. 9]

poortenturrens ende ter vesten allomme uutghesteken, so dat de wapenen rontomme de mueren ende de vesten ende ter poorten als selvere ende assuere van sablen blicten jeghens de sonne, als of den fluer van de gulde spooren binnen der stede hadde gheweest, want den meesten deel waren alle ghesproten van die edele Trojanen, wiens fame gheheel de weerelt duere was bekent, ende ooc van die victorieuse Romeynen, wiens sweerden over al de weerelt ghecloncken hebben.