Den nieuwen verbeterden lust-hof gheplant vol uytghelesene, welgherijmde, eerelijcke, amoreuse ende vrolijcke ghesanghen
(1607)–Michiel Vlack–
Auteursrechtvrij
[pagina 96]
| |
Op de wijse: van De lustelijcke May.Ghy Musen fijn,, op dit termijn
Coomt wilt my gheselschap houwen
V medelijn,, en claer aenschijn
Daer op sal ick betrouwen:
V gratie ist dien ick soeck
Gheeft my verstant soo sal ick cloeck
V cracht daer by ghedencken
Een vrolijck liet oock schencken.
Sol wyt befaemt,, Phoebus ghenaemt
Claer licht des Hemels schoone
Als ghy voort quaemt,, Soot oock betaemt
Buyten des Hemels throne,
Hebt ghy Vulcanum openbaert
Daer Mars en Venus onghespaert
Sijn beddeken besmetten
Ghy woudet gaern beletten.
Coemt hier zeer saen,, op dese baen
Vulcane wilt u spoeden
En wiltse vaen,, tis haest ghedaen
Soo als ick can vermoeden,
Sy legghen nu en slapen vast
Brenght voort u Net, indient wel past
Het is in u vermooghen
Sy hebben u bedrooghen.
Beschaemt haer nu,, die quellen u
Soo sy oock voormaels deeden
Tis my een gruw,, soo dat ick spuw
Van alle dees boosheden:
Vulcanus heeftet haest verstaen
En heeft ghevolcht Phoebi vermaen
Hy heeftse naeckt ghevonden
Vast in syn Net ghebonden.
Ghy Gooden hoort,, coemt rechte voort
En wilt dit spel aenmercken
Jck ben ghestoort,, verstaet dit woort
Of dit zijn goede wercken:
Voorwaer ick was ghereyst van huys
En hier gheschiet sulcken abuys
Jck macht immer niet lyden
Ja nimmermeer verblyden.
Al watter was,, inden Hemel ras
Js derwaerts haest ghekomen
Mars op dat pas,, soo groen als gras
Venus hebbent vernomen,
Elck dreef waerlijck met hun sijn spot
Sommich wild' wel het waer haer lot
Al soud hy sulcx beeruen
Hy achtet voor een sterven.
Prince.
Prince de Goon,, aldaer ontboon
Hadden hier in behaghen
De Goddinnen vloon,, van sulck vertoon
Soo haest als sy dat saghen
Neptunus badt Vulcanum aen
Dat hy Mars, Venus, los liet gaen
Hy hoord' Neptuni beede
Dies vlooch elck op sijn stede.
FINIS |
|