Den nieuwen verbeterden lust-hof gheplant vol uytghelesene, welgherijmde, eerelijcke, amoreuse ende vrolijcke ghesanghen

[Verheven grootsche ziel]

Op de wijse: Fortuyn helaes bedroeft.

Verheven grootsche ziel die zwerelts doen belacht,
Die rijckdom boven maet, en heerschappy veracht
Eerwaerde wijse vrou die met u hooch verstant
Der andren glants verdooft en steden maeckt te schant.

Dits mijn hoochdraghentheyt dits al mijn hoverdy
Dat u verheven ziel comt over een met my:
Dits al mijn hooghe moet dat ick u waerde ken,
Dits my mijn vrijheyt waert, dat ic daer slaef van ben.

Mijn vrou ick ben u slaef nu heel wanty ghy verwont
Tweespannich deel mijns harts dat u noch tegen stont
Wanneer u heusheyts cracht beweechde mijn gemoet,
Ghelijck de sachte slaep den afghesloofden doet.

Vol oproers was mijn borst vol felle wint en brant
En onbesuysde storm quelde mijn inghewant
En mijn verdeelde gheest was heel met twist beroert,
Die wijl men in mijn hert een heftich oorloch voert.

Mijn vrou t'verwonnen deel, vant hart was op u zy
En t'onverwonnen deel weygherde slaverny
Hier was een harde strijt tot dat u heusheyt quam,
Die licht die rest van 't hert vermeestert inne nam.

Ghelijck den sachten slaep die veel ellenden sust
De moede leden stroockt met aenghename rust:
Alzoo u heusheyt die vant hart was langh verbeyt
Stroockt my tgemoet met noch heftigher sachticheyt.

Door u verwinningh vrou eyndicht den harden strijt
Jn mijn verwonnen hart ghy die Princesse sijt
Daer u verheven deucht op trijckst geschildert staet
Ach soete slaverny die boven vrijheyt gaet.