Den nieuwen verbeterden lust-hof gheplant vol uytghelesene, welgherijmde, eerelijcke, amoreuse ende vrolijcke ghesanghen
(1607)–Michiel Vlack–
Auteursrechtvrijop de voys: Brande Matresse.
Och waer ick sonder treuren
Jck songh een vrolick liedt,
Moght my mijn lief ghebeuren,
Soo waer ick uyt 'tverdriet
Mijn droefheydt soud' ick scheuren
Want schoonder weet ick niet.
Als Helena ghepresen
Jn schoonheydt excelent
Soo is mijn lief van wesen
Gheen schoonder hier ontrent
Haer schoonheyt uytghelesen
Doet mijn jonck hert torment.
Wat baet doch al mijn claghen,
Zy acht het doch als wint
Jck kan haer niet behaghen
| |
[pagina 28]
| |
Het goet heeft haer verblint
Al can zijt niet me draghen
Dies word ick niet bemint.
W ilt liefken overdencken
Dat 'tgoed ter wereld blijft,
En dat de ziel kan krencken
En anders niet bedrijft,
Veel quellingh salt u schencken,
Den twist het zeer verstijft.
Of ghy wel creeght de croone
Van rijckdom triumphant
En mist ghy den persoone
Ghy mist den besten pant
Wat hebdy dan ten loone
Als rijckdom vliet van kant?
Ten is niet al gheleghen
Jn's wereldts grooten schat
Loopt u 't gheluck eens teghen,
Wat hebdy dan te bat
V ghelt min heeft ghekreghen
Verdienst na wercken wat.
Princes laet my ghewinnen
Eens troost, soo't u behaeght
Want liefde doet my minnen
V suyverlicke Maeght
Jck sal u noch besinnen
Al word ick nu verjaeght.
Elck kan falen. | |
Cruys-veers.
Soo wie om 'tgelt,, zijn lief behaeght,
Die word om 'tgelt, maer niet om 'tvel
Ghetrout: maer haest, te laet beclaeght
Als elck een roept, het mijn blinckt wel.
|
|