Den nieuwen verbeterden lust-hof gheplant vol uytghelesene, welgherijmde, eerelijcke, amoreuse ende vrolijcke ghesanghen
(1607)–Michiel Vlack–
AuteursrechtvrijOp de wijs: Met gantscher bedructe herten, etc.
God schiep de man inden beginne
Na zijn even-beelde vry
Ten is niet goedt sprack hy met sinne
Dat den mensch alleene zy
Jck wil hem gaen gheuen
| |
[pagina 16]
| |
Om vreedsaem te leven
En hulp in zijner tijt
Zoo mach hy met eeren
Zijn saedt vermeeren
Alhier ter wereldt wijt.
Man en wijf sullen te same
Wesen hier int aerdsche pleyn
Twee zielen in een lichame
Met den bandt der liefden reyn
Tsamen verbonden
Tot allen stonden
Te leven met accoort,
Malcander minnen
Met hert en sinnen
Vreedsaemich soo't behoort.
Een man sal vader moeder laten,
En zijn wijf aenhanghen vast,
Die oock om gheene dinghen haten
Werd ons van den Heer belast,
't Vrouken daer teghen
Me sullecks sal pleghen
Als een deughtsame vrouw'
Op dat zy aerdich
En oock rechtvaerdich
Ghebruycken hare trouw'.
Prince.
Aenden Prince wilt ghedencken,
Die daer leeft in 's Hemels troon
Hy wil u zijn seghen schencken
En daer by der eeren croon,
Zijt hem ghedachtich
Hy is even krachtich
Al in de wercken zijn
Als hy was ten tyden
Doen hy met verblyden
Van water maecte wijn.
|
|