Den nieuwen verbeterden lust-hof gheplant vol uytghelesene, welgherijmde, eerelijcke, amoreuse ende vrolijcke ghesanghen
(1607)–Michiel Vlack–
Auteursrechtvrij
[pagina 15]
| |
Op de wys: O Roosken root.
V treckent wesen, en claer ghesicht
Brengt my in vreesen, o Venus nicht,
Jn mijn mijsval, de Go' on ick al
Roep aen
Die mette trouwe minne zijn begaen
V fraey manieren, lief amoureus,
Dat ghy cont stieren, so gratieus
't Gentil cieraet, daer ghy mee gaet
Godin
Verwert u dienaer inde heete min.
V cortoiseren, en fraye praet
Jn slaef verkeeren, en vryer gaet,
V soeten sanck, hout my in dwanck
Soo zeer
Dat ick my selven eyghen ben niet meer.
Hoe groote prijs, leyt, is wel bekent
Aen uwe wijsheyt soo excellent
Minervam gaef, maect my een slaef
Van dy,
Die vrolick van te voren was en bly
Prince.
Princes welspreecken, en singhen soet
En schoonheyts teecken, en wijsheyt vroet
Men voeght dees maer, met wreetheydt swaer
Te saem
Sy gheven u Pandoras rechte naem.
Adieu schoon lief die ick heb bemint
Mint ghy een ander u wel beraet,
Raed of ick my bet heb besint:
Sint dat ghy my liet desperaet
Raedt ontbrack my en quam te laet,
Laet ghy my ick kies oock een lief,
Liefst had ick nochtans u ghenaet
Naat scheyden mist elck zijn gherief.
|
|