Den nieuwen verbeterden lust-hof gheplant vol uytghelesene, welgherijmde, eerelijcke, amoreuse ende vrolijcke ghesanghen
(1607)–Michiel Vlack–
Auteursrechtvrij
[pagina 1]
| |
op de wyse: Gheselleken du most wandelen, etc.
Jnt hert ly ick van binnen,, pijn
Dies heel ontroert die sinnen,, zijn
Om u deughdsame maecht.
Die listigh hebt ghejaecht
Jnt vierigh net van minnen,, mijn
Dat Venus dede spinnen,, fijn
Twert Cupido gheclaecht.
Hoe deerlijck ghy my plaecht:
Ghedoocht dat hy mach schieten
Jn u der liefden schicht.
En laet doch my ghenieten
V vriendelick ghesicht.
Daer hy door spandt
Zijn boogh en plandt
Jn my dit swaer ghewicht,
Twelck my ontmandt
Door swaren brandt,
Ten sy ghy my verlicht.
Nochtans ick met begheeren,, goedt
V altoos jonstigh eeren,, moet
Op hoop oft ghy int endt
V straffe zinnen wendt:
Soo ghy v tot verneeren,, spoet
Vreught sal in my vermeeren,, soet
Jn stede van't elendt
Dat my nu houdt verblendt
Jn d' onbreecklijcke banden.
Jst niet een sware last
Daer my 't begheert in spanden
Tot u persoon zeer vast.
Melancoly
En vreughts party
Daghelijcks in my wast,
Dies vind ick my
Gheduerigh by,
Die slaverny vergast.
Toont aen my gheen moordadigh,, feyt
Maer bewijst u ghenadigheyt
Als een eerbare vrouw.
Toont haer Minnare trouw
Na troost mijn hert ghestadich beyt
| |
[pagina 2]
| |
Dat ghy van u versmadich,, scheyt
En moet sterven van rouw
So ghy o reijn carssouw
My niet en wilt ghenesen
Van 'tgheen door Venus kindt
Jnt herte is gheresen.
Hierom u wel besindt
Waer toe dees haet
Dat ghy dus quaedt
Mijn vrolickheydt verslindt,
Daer naest God staet
Mijn toeverlaet
Op u, o lief bemint.
Prince.
Princes neemt op dees reden,, acht,
Laet hebben mijn ghebeden,, kracht
By u, soo't mach gheschien,
Mijn leedt suldy doen vlien,
Jn dese daedt gheen wreeden,, slacht
Maer u lof te verbreden,, tracht
Met jonst t'mywaerts te bien
Daer ick door mach bespien
V hert oprecht en goedich
Om u dienaer t'ontfaen
Die tot u bidt ootmoedich
Of ghy hem wilt ontlaen
Van 'tswaer verdriet
Dat my gheschiet
Door Cupidoos bestaen,
Doch van u niet
Sal wijcken yet
Eer mijn de doodt komt aen.
Wie kant ontvlien? |
|