Den nieuwen verbeterden lust-hof gheplant vol uytghelesene, welgherijmde, eerelijcke, amoreuse ende vrolijcke ghesanghen

[Ghy Druckers die om strijt]

Ghy Druckers die om strijt te printen zijt ghesindt,
't Zy wiens copy het zy, als ghy daer baet by vindt
Dit Liet-boec int gheheel oft stuc-wijs na te drucken,
V hier verboden wort, Soo ghy doch 'trecht bemint,
Want hier en is niet outs, het zijn al nieuwe stucken
Met groote moeyt vergaert, en wilt dan hier niet plucken
Maer neemt wt sulcken tuyn daert u gheoorloft wort
Op dat u werck altijt ten besten magh ghelucken,
Den seghen Godes med' daer over zy ghestort,
Het gaet hem selden wel die na eens anders port.

Recht moet recht syn.