Den nieuwen lust-hof

(1602)–Michiel Vlack– rechtenstatus



[pagina 52]
Nieu liedt op stems behaghen: VVee my ick magh vvel claghen. VOor al in mijn behaghen Soo staet een bloeme schoon, Mijn hert haer jonst wil draghen Door dat ick haer persoon Croon// onder 'shemels troon Loon// wacht ick nu idoon. Ick hoop en twyfel mede Of zy my oock bemint Als Hero schoon oock dede Haer lief, haer man, haer vrint Int// water door den wint Vint// zy hem doot gheschint. Die sorghe doet my duchten Maer hope my verblijt, Dies ick niet meer wil suchten Want in vrou Venus strijt Lijt// geiren 'thert dat vrijt Spijt// clappers haet en nijt. Hoe soud' ick niet aencleven Dit bloemken openbaer, Mijn juedigh hert, mijn leven Dat hanght alleen aen haer Naer// God soo ick voorwaer Maer// opentlick verclaer. En haer oock niet te minnen Is niet in mijnder macht, Want onder die Godinnen Soo isse waert gheacht Cracht// toontse dagh en nacht Tracht// geiren na een dracht. Princes cost ick u schryven Mijn hert en mijn ghemoet, Ghy sout my niet verdryven Maer helpen met der spoet Goet// uyt Cupidos gloet Doet// dit reyn roosken soet. Elck kan falen.