Den nieuwen lust-hof
(1602)–Michiel Vlack–
AuteursrechtvrijOp de wijs: Ick vveet noch een Casteel, &c.ALleen mijn sinnen staen
Op een bloeme der vrouwen
Seer schoon en wel ghedaen
Lieffelick int aenschouwen,
Hier in des wereldts pleyn,
Weet ick gheen maeght so reyn,
Die ick liefde draghe certeyn.
Reyn liefde my verweckt
V dit te openbaren,
Hoe dat ick u subject
Blyve met groot beswaren,
Om u schoone ghelaet
Blinckenden dageraet
Van leven vroom en delicaet
Och neemt my liefste aen
Als uwen dienaer spoedigh
Op dat ick magh verstaen
V redenen zeer goedigh,
Daer ick na heb verlanckt
Soo wort ghy zeer bedanckt
Want mynen troost heel aen u hanght
Op aerden gheenen naem
En magh my so vervreughden
Dan ghy schoon lief bequaem
| |
[pagina 24]
| |
Verciert met alle deughden
Gheen Godinnen men vont
Nu noch tot gheender stont
die prijs bouen u schoonheydt wont.
Laet liefde immers eens
V suyver hert doorstralen,
Op dat ick wat ghemeens
Aen u persoon magh halen
Pence pour moy somtijt
Maeckt mynen gheest verblijt,
En denckt eens wat u dienaer lijdt.
Prince.
Princersse doet my recht
Soo Amoureuse pleghen,
Waer ick met u in echt,
Soo waer mijn saeck ter deghen
Schoon liefken onbesmet
Verhoort doch mijn ghebet,
dus op mijn redenen wel let.
Finis. |
|