Den nieuwen lust-hof

Liedeken

op de wijs: Van Venus loose treecken.

Wat ist dat my van binnen
Aldus beroert de sinnen
Dit ben ick onghewoon
Want duchten, treuren, klachten
By my altoos vernachten,
En al mijn vreughde doo'n.
Sout ghijt liefd' moghen wesen?
En in my zijn gheresen

[p. 7]

 

Door mijn liefs claer ghesicht

 

Zoo wilt haer oock doorschieten

 

Op datse mach ghenieten

 

Den brand van uwen schicht.

 

Werdt zy die my deelachtich

 

Ick hoop mijn beede clachtich

 

Sal van haer zijn verhoort,

 

Soo dat zy dan sal wenden

 

Van my dees swaer elenden

 

Met een troostbarigh woordt:

 

Dat mijn lust kan vernoeghen

 

O God wout ghy soo voeghen

 

Na mijn behaghen maer,

 

Vreese en hoop partyen

 

Dit baert in my groot lyen,

 

Om te verdraghen swaer.

 

Hoop leijt mijn troost te voren,

 

Maer vreese comt verstoren

 

die sinnen metter spoed,

 

doch lief'd maect 'thert weer moedich

 

door 'tpeijnsen overvloedigh

 

Op mijn liefs reijn ghemoed.

 

dat my verwect tot vreughden

 

door de volmaecte deughden

 

die ick in haer beschou

 

Och moghtse my ghebueren

 

Al mijn verdriet en treuren

 

Zeer haest verkeeren sou.

 

Prince.

 

Princesse lief verkoren

 

die u trou heeft gheswooren

 

doch eens weer liefde biet

 

Op dat hy voor de smarte

 

In zijn liefdraghent herte

 

V trouwigheyd gheniet.

Wie cant ontvlien?