Conclvsion de l'Avthevr.
TRes chers & bienaimez Disciples, ie vous ay bien voulu aduertir d'vne chose, c'est, que si vous trouuez quelques Dialogues traitants trop brieuement, & non pas assez amplement, les choses, qui s'y disent & racontent, vous prendrez la peine (si vous voulez prouffiter) de parlire, & confronter ceux ci, à mes autres Dialogues, traictants du faict de la Marchandise, car les vns sont faicts pour suppléer au defaut des autres, & touts deux, pour vous donner vn desir, & esguillon d'amour, qui vous incite & induise à lire quelque autre beau liure, & bon Autheur, qui vous face paruenir à la perfection de ceste Langue Franςoise. Et pour exemple, vous voyez que ce premier Dialogue ci traicte de choses communes, comme de papier, encre plumes & Liures, si vous en demandez des bons, cerchez aux autres Dialogues, & nomméement, le Libraire, il vous fournira de toutes telles choses: & si vous voulez faire relier vn Liure, nettement & brauement, addressez vous au Relieur, il le vous accoustrera tres-bien. Ce second Dialogue fait mention de plusieurs accoustrements, & draps de soye, si vous en auez à faire, d'autre sorte, soit de Laine, ou de soye, de passements, spiguilles, ou veloutez, pour les border. Parlez au Passementier & Mercier, au Marchand de drap, de drap de soye, au Marchand de cuir, & fourrures aussi, si vous voulez, car ils sont assez bien garniz de toutes sortes. Ce cinquieme Colloque ci, traite du chemin & voyage, si vous auez à faire de quelques hardes, d'vn bon cheual, ou de bonnes armes, parlez au Courtier de cheuaux, & à l'Armurier, ils vous en feront bon marché, car ils ont à faire d'argent. Le Sixieme, parle des Vtensiles d'vne cuisine, si vous voulez de toute sorte de Vaisselle d'or & d'argent, allez vous en trouuer l'Argentiér, il vous en baillera pour de l'argent. Ce septieme & huitieme ci font mention de manger & boire, ensemble de viandes & bruuages: si vous voulez acheter de toutes sortes de chairs, poissons, poulailles, venaison, ou espiceries pour les accoustrer, aussi plusieurs sortes de vins: Voyla, le marchand de vin, le boucher, le poulaillier, le poissonnier, l'espicier, & le succrier, qui n'attendent plus que vous. Ces quatre derniers Colloques ci, traitent des quatre saisons de l'an, & de plusieurs sortes de fleurs, arbres, semences, grains, & fruits de la terre, si vous en demandez, il ne faut que vous transporter pardeuers le Marchand de blé & la fruitiere, ces deux la vous fourniront de plusieurs sortes d'herbes, de fleurs, de fruits, & de grains, & parainsi l'imperfection de l'un, seruira de perfection à touts deux, en leur qualitez. Comme aussi voz bons Maitres vous sauront bien monstrer, ausquels ie vous conseille d'obtemperer tousiours & leur donner audience, comme außi Dieu le vous commande, auquel ie vous recommande.
FIN.
Desen boeck is geuisiteert ende geapprobeert by den Eerweerdigen Heere H. Hendrick Dunghen Canonick van onser lieuer Vrouwen t'Antvverpen. S.T.D.
Auteursrechtvrij
