Chronijcke van Ghendt

XVI^c XXII.

...Alsoo upden IIII Mey lestleden uuyt Ghendt vertrocken waeren drij schepen met taerwe voor amonitie naer Damme, gheconvoieert met ontrent veertich soldaeten, som Spaingnaerden, so eyst ghebuert dat de zelve schepen, commende tusschen Damme ende Celie, dat die van Aerdenburch uuyt zijn ghecommen ontrent drij hondert steerck en hebben de zelve schepen aenreest ende ghenomen; het convoy sette hun aen tloopen naer Damme, achter laetende vier Spaingnaerds, die waeren ghevanghen; ende twee zo drije blevender doot, waeraf men seyde den eenen corporael was jnt casteel. Nu daerentusschen dat tvoorn. convoy naer Damme vloot, soo brochten die van Aerdenborch dertich waghenen ende peerden met ijdel sacken ende laedden een deel waghenen met graene, meenende alsoo tzelve naer Aerdenburch te voeren, maer tvoors. convoy ten Damme commende ende daeraf de advertentie ghedaen hebbende, sijn die van Damme met het voorseyde convoy uuytghevallen ende ghecommen ter plaetsen, daer die van Aerdenburch noch al besich waeren om

[p. 415]

de zelve schepen te ijdelen ende de waeghens te laeden, soo dat daer een schermutselinghe gheviel; emmers ten eynde wierden die van Aerdenburch verjaecht, zoo datter doot bleven ontrent zes ofte zeven soldaeten van die van Aerdenburgh ende viere ofte vijfve ghevanghen, met alle de voors. waghenen ende cooren, ende wiert alsoo alle noch ten Damme jnne brocht.