Chronijcke van Ghendt

[p. 413]

XVI^c XXI.

Jn dit bovenschreven jaer van XVI^c XXI, upden dach van het uuytgaen vanden trevis, zijn diveersche trouppen van vrijbuyters uuyt Sluys, IJsendijcke ende Aerdenborch ghecommen ten landewaert jnne omme te rooven, waeraf datter eenighe ghevanghen wierden ende te Brugghe binnen brocht.

Item jnde Paeschweecke namen de vrijbuyters up Landeghem, ontrent den muelen, boven Meerentre, drij ofte vier peerden, maer den landtsman, die de zelve peerden toebehoorde, ontchappeerde. Ende alsnu deden de ghuesen de landtslieden groote contributie gheven.

Jn dit zelve jaer, den XXV Maerte, passeerden duer Ghendt vier vendelen Waelen, ter Keyserpoorte jnne ende ter Brugsche poorte uuyt, waeraf datter een vendel bleef ligghen buyten de Brugsche poorte jnt voorbouf, ende tweede vendel noch wat voordere, ende tderde veendel oock noch voorder, ende tvierde van ghelijcken. Ende ghingen alsoo ligghen al lancx de nieuwe vaart ter bewaernesse van dien, elck vendel ontrent een mijle van elcanderen, stellende nacht ende dach goede wacht ende sentinelle; en upden dijck vande voorn. nieuwe vaert, ontrent twee boochschoten van elcanderen, omme daermede te beletten den voorn. viant over te commen. Ende tsanderdaechs den XXVI Maerte trocken de vier leden van Vlaenderen, metgaeders den gouvernuer van tcasteel van Ghendt, al lancx de zelve vaert omme te ordonneren waermen de forten, redouten ofte steercten maecken zoude om tlandt vrij te gaen houden vanden ghuesen ofte vrijbuyters. Ende upden XXVII Maerte brachten de zelve soldaeten eenen ghevanghen binnen Ghendt.

Jn dit zelve jaer, ontrent den XIX April, quamen

[p. 414]

de ghuesen upde nieuwe vaert ontrent ter oostmuelen, prochie van Aeltere, ende namen aldaer ontrent XXVIII zo XXIX peerden, het welcke waeren peerden die de waetermuelen drayden, dienende tot het uuytoosen vande nieuwe vaert, om de zelve drooghe te houden om de weercklieden daer jnne te weercken, midts dat de zelve vaert noch niet gheheel volmaect en was.

Jn dit zelve jaer, den VI Meye, hielden schepenen van ghedeele haerlieder vierschaere voor deerste reyse jnt nieuwe stadthuus, hoe wel het zelve noch niet vulmaect en was.