Chronijcke van Ghendt

XVI^c IX.

.....Den XXVI Novembre heeft onsen nieuwen bisschop van Ghendt, ghenaemt Carolus Masius, sijnen jntrey ghedaen, commende van sente Baefs, seer solempnelic, met veel edeldom vande stadt, ende ooc veel van Bruyssel; daer ghinghen hem ooc jeghens de vier guldens jnde waepen, seer schoon ghemonteert, commende alsoo tot jn sente Jacobs keercke, alwaer den Raedt met de processien vande vier oordens ende alle de prochien aldaer waeren verwachtende, hem van daer voorts convoyerende tot jn sent Baefs keercke, alwaer den solempnelen dienst ghedaen wiert. Ende daer waeren tsijnder tafele meer dan drij hondert persoonen ten etene, ende hij schanck elck gulden een stick franschen wijn van hondert stoop.