|
| |
XVc XC.
...Den XXI Maerte waeren de vrijbuyters tusschen Zeveneecke ende Loochristi, wel veertich ofte vijftich steerck; daer waeren wel acht hondert boeren ende sommighe soldaeten uuyten casteele van Ghendt, waeraf vande voorseyde vrijbuyters twee jn Ghendt brocht waeren, ende wierden beede upden Coorenaert ghehanghen. Ende noch viere wierden binnen brocht, doot zijnde, ende wierden alsoo alle sesse naer de Muyde ghevoert ende daer zom metten voeten upwaert ghehanghen. Ende jnt vechten bleef een van onse soldaeten doot, ende wel zeven ofte acht boeren. Ende de resterende vrijbuyters ontquamen ende roofden noch tsnavons te Roonhuuse een schip.
...Upden X April drouch jor Gillis vander Meere binnen Ghendt eerst de roede als onderbailliu der stede van Ghendt, jnde plaetse van Hueverbeke, diet duer qualic dienen verloren hadde.
...Den IIII Julius zoo was de galghe upden Coorenaert gheweert, dieder ghestaen hadde wel dertich jaer, want zij verbrant was van sente Pieters vier te maecken.
....Item upden V Septembre waeren de vrijbuyters te Duerle ende vermoorden zeer deerlick eenen coopman van beesten, ende (namen) andere ghevanghen; ende men seyde datse seer steerck waeren. Ende van daer trocken zij te Nokeren, bij Audenaerde, ende verbranden de
| |
| |
keercke ende muelen ende andere huusen, ende vermoorden den pastoir; ende niemant en wasser jeghens. Alsoo deden zij al dat zij wilden, ende trocken alsoo voorts naer Aalter, onder weghe Brugghe, ende verbranden ooc aldaer keercke ende muelen, met meer andere huusen ende hoven, ende roofden onder weghe Rijsel diveersche schepen, zoo wel groote als cleene. Godt willet voorsien.
Jn dit zelve jaer van XVc tneghentich, den XXII Octobre, zoo roofden de vrijbuyters het maertschip van Rijsele, ende zij bleven noch jnden bosch ligghende, ofmen hemlieden niet vervolghen en soude. tVolck van Wijchuus lach te Deinse, de welcke den XXV moesten uppe naer Brugghe, midts dat die van Oostende Audenburch hadden gherooft ende jnghenomen, de wachte aen de poorte vermoort jnt open doen, smorghens met den dagraet; tgarnisoen lach noch en sliep alse bespronghen waeren. Ende Wijchuusens volck, van Deinse uptreckende naer Brugghe, commende een mijle boven Deinse, wierden de Vrijbuyters ghewaere; ende de Vrijbuyters die versloughen zesse van Wijchuus soldaeten, die jnt bosch laghen. Ende tArdenburch vinghen zijlieden den hueversten vande canosie ofte cloostere, datter stont, met alle de hoofden van aldaer, om te stellen ten grooten rantsoene; ende menighe schoone beeste, die sij mede dreven naer Oostende voor buyt. Die van Brugghe waeren oock jn groote benautheyt, want wij en hadden gheen volck ligghende ontrent Brugghe. Men surchde zeere voor tovercommen vanden viant.
Jn dit zelve jaer van XVc tneghentich, den X Novembre, up sente Martens avont, zoo was sententie ghegheven over den present meester, ghenaempt Thomaes de Block, welcke officie hem dede hebben den heere van Wackene, alsdoen hoochbailliu der stede van
| |
| |
Ghendt. Ende de sententie sprack: Omme dies wille dat hij, Thomaes, van over thien jaeren tot nu toe de stadt huer eere ghenomen hadde jnt presenteren vanden presentwijne, conterfeytende de handteeckens vande groote meesters ende gaende daermede anden tresorier om ghelt, ende hij stact jn sijn buese, want de ghepresenteerde en wistender niet af, ende de stadt bleef gheblameert; ende jn exemple van andere was (hij) ghevoert up eenen waghen met de schroo voor dhooghen ende een strop aen sijnen hals ende ghegheesselt ende ghebannen vijftich jaer ende dach uuyt den graefschepe van Vlaenderen, midts ghevende twee hondert ponden grooten voor restoore. Daervoor was zijn huus toegheseghelt om tvulcommen vanden vonnesse, twelck huus stont upde Hoochpoort, upden houck vande straete loopende naer de Putte, naest de consierge vande kuere. Ende zijn huusvrauwe moeste de pacientie nemen jn vanghenesse tot diese tvonnesse vulcommen hadde jnt betaelen vande twee hondert ponden grooten ende anderssins.
.....Den XXVIII April zoo waeren vande guesen vier schepen gherooft, die van Rijssel quamen, daerse wel vier duysent guldens gauts buyt hadden, ontrent zij (sic) hondert steerck zijnde.
Upden Mey avont waerender noch twee schepen afghestelt tusschen Dendermonde ende Ghendt, vande vrijbuyters, met veel goets.
Upden VII Mey jnden morghenstont, zoo was Eertvelde vande guesen gherooft ende afghebrant ontrent twintich huusen.
....Upden VI Junius zoo waeren overcommen ende laghen veel vrijbuyters tusschen Schelde ende Leye, de welcke ontboden de ghedeputeerde vande casselrie van Audenaerde tot brandschat ende contributie, ontbiedende datse met hemlieden zouden con- | |
| |
tracteren, ofte dat neen, sij soudent hemlieden wijs maecken; aldus hemlieden gheschreven van die van Oostende, daeromme die van Audenaerde vertrocken thove omme te wetene watser mede doen zouden. Ende jn dien nacht soo roofden de zelve, ofte huerlieder compaignie, Muelestede van al datser vonden, lijnen ende wulle, ende al dats was, ende drije vande principale namen zij ghevanghen ende steldense ten grooten rantsoene. Ende te Belsele namen sijlieden noch twaelf pachters ghevanghen ende leedense met hemlieden, zonder dat hemlieden eenich belet ghedaen was van sconincx weghe.
Ende upde prochien tusschen Schelde ende Leye bleven noch vrijbuyters ghenouch ligghende, teghen dat pas gaf om den coopman te spolieren ende andere goede mannen, die heuren wech ghinghen, soomen noch wel hooren zal, want alle velden waeren bosschen ende thaerem ghemeente was daghelicx bezwaert met groote ghiften te gheven, soo dat niet wel mueghelic en wiert dat tghemeente meer tpac draghen en coeste.
Jn dit zelve jaer, den IX Junius, zoo waeren tOlsen ghesien ontrent twee hondert vrijbuyters jn diveersche plaetsen. Ende upden X zoo waeren van ghelijcken voor de Waelpoorte veel vrijbuyters, ende van ghelijcken bij Ste Amants beerch ende daerontrent.
Ende upden XI aenreesden zijlieden eenen waghen ontrent Westvelt, daerup was mher Gillis Borluyt ende andere, die sijlieden ghevanghen namen ende met hemlieden leedden om ten grooten rantsoene te stellen. Sijlieden laeghen tlandt duere ende deden al dat sij wilden; ende wij en hadden up dit quaertier niemant, noch ruyteren noch soldaeten: twas al jn Ghelderlant ende jn Brabant ende Vrieslandt ende daerontrent.
| |
| |
.....Item up desen zelven XIIII Junij, naer den noene, teghen den avont, zoo ghebuerde te Nevele eene foele, daer capitein Steven bespronghen was vande Vrijbuyters, aldaer capitein Steven zijn peert gheschoten was ende hij jnt afspringhen vouchde hem om loopen; ende wiert jnt loopen duer zijn been gheschoten, dat zijnen loop beledt was, ende was metter hitte doot gheschoten. Ende Waesbeerghe, zijnen lutenant, was ghevanghen. Ende de foele ghedaen zijnde, bonden Waesbeerghe aen eenen appelboom ende verbranden hem met walmen viers, met een handtvol smaels, brandende tot der doot toe. Ende eenen van hemlieden was ghevanghen van ons volck ende te Nevele up tcasteel ghedaen, dwelck zijlieden ghinghen bestormen, maer ons volck waeren zoo wel voorsien van alle canten, datser niet en haelden; ende zes zo zeven vande vrijbuyters blevender doot ende drije van onslieden; ende siende dat zij tcasteel niet crijghen en coesten, zoo staecken zijlieden tvier jnde prochie, twelck verre al af verbrande, up een huus naer, dwelc tcasteel bescheermde duer huerlieder vromelic schieten naer den viant; want zij meenden noch te crijghen eenen ghevanghenen, van Thielt gheboren, die ons volck up tcasteel hadden, maer zij en creghen hem niet duer de cloucheyt van die up tcasteel laghen; maer wiert den zelven ghevanghenen jn Ghendt brocht ende wiert corts daernaer ghehanghen.
.....Item noch jnde voorgaende wecke soo was den pastoir vande Cluusen ghevanghen anden aultaer, daer hij messe dede, vande vrijbuyters; ende de keercke gheheel gherooft ende ghepilgiert; ende leeden hem mede, stellende hem ten grooten rantsoene, met meer andere. Ende jnde zelve wecke waerender schepen, van Rijssele commende, afghestelt.
....Upden XXI Hoymaent zo deden de Jesuwijten
| |
| |
hueren eersten dienst jn huerlier nieuwe keercke, die zijlieden ghemaect hadden vande zale van thuus van Jan van Jmbiese, staende jnde Volderstraete, de welcmen seer schoone ghecroont hadde ende versiert ter eeren Godts ende ter oneere van Jan van Jmbiese, die alhier te vooren gheexecuteert was.....
Upden XXIIII Julij zoo was vande Vrijbuyters noch een schip gherooft upde Schelde, dat van Audenaerde quam, ghelaeden met coopmans goet, als lijnwaet, ende anders wel weert wesende, soomen seyde, vier hondert ponden grooten.
Den XXX Ougste zoo waeren upden Coornaert twee jonghers gherecht metten stroppe, die up vrijbuyt op den boer ghegaen hadden; den eenen was den sone vanden offichier vanden onderbailliu, ghenaemt Stocman, ontrent XIX jaeren oudt wesende; ende dandre den sone van........ooc van sulcker oude. Ende hadden beede huerlieder keerchof.
Ende up desen zelven XXX Ougste, teghen tsavons, vonden hemlieden de vrijbuyters ontrent Haerelbeke, ter Langher haghen, ende roofden den bode van IJpere ende namen hem ghevanghen met noch vijf zoo zes pachters. Sij waeren steerck derthiene ofte daerontrent.
Jn dit zelve jaer, upden XI Octobre, was tAndwerpen een Spaingnaert onthooft, die ghetraut hadde een dochter vander Vichte, den zelven die Hulst overgaf jn handen vande guesen, met noch veel quaets aen hem bevonden.
Den XIIII Octobre roofden de vrijbuyters een schip, dat quam ter Schelden af van Audenaerde, daer veel goets jnne was; ende namen den bode ghevanghen ende plunderden hem met meer andere ghevanghenen.
Item den XVII Octobre zoo roofden de vrijbuyters
| |
| |
een schip, datter Leyen af quam van Rijssele, wel ghelaeden met alderande goet ende creghent al daer zijt begheerden thebben zonder slach ofte stoot.
|
|
Auteursrecht onbekend