Chronijcke van Ghendt

XV^c XCII.

Jnt jaer XV^c XCII, den XX Maerte, voor noene, zoo brochten de nieuwe Carobijnen ter Petercelle poorte jnne twee vrijbuyters, die sij ontrent Deinse ghevanghen hadden; ende twee hadden zij doot gheschoten van neghenen. Ende upden XXI Maerte, voor den noene, zoo waeren zijlieden upden Coornaert ghehanghen; den eenen starf catolijc, ende den anderen verclaerde dat hij starf voor zijnen cueninck, sijnde eenen Jnghels man.

Jn dit zelve jaer.... upden Paesch avont, jnder nacht, so was eenen vrijbuyter ghevanghen, die van Ghendt was, ghenaemt Pier Tobias; sijn moeder plochte penssen te sie(de)ne, nu woonende te Middelburch jn Zeelandt; ende hij hadde wel zes jaer up vrijbuyt hem omtdreghen, maer was nu ten hende ghecommen ende was nu ter Dampoorte jnne ghebrocht. Ende noch eenen wasser doot ghestecken, die jnt waeter stont met een pijcke, die hem niet ghevanghen en wilde gheven. En de andere, vijfve ofte zes, die ontliepent, als eenen ghenaemt Basselaere, van Destelbeerghe, die veel quaets ghedaen hadde ende veel exploeten van tierannie ghedaen; jnde handen zijnde es noch eens hemlieden ontwustelt.

Upden III April zoo was desen vrijbuyter bij schepenen vander kuere verwesen ende daernaer ghehanghen upden Coorenaert, een poorter zijnde vande stadt, ende starf catholijc, ende hadde zijn keerchof. Hij was upghequeect jnde Rame, alsoo clouck eenen

[p. 400]

man was als op voeten mochte gaen, XXXVI jaeren oudt zijnde. Godt ghedincke zijne ziele.

Item alsnu jnden avont zoo waeren ontrent XVI ofte XVIII pachters van Cruyshautem upden wech ghevanghen vande vrijbuyters, daer sij van Ghendt quamen metten bailliu van Olssene, die ooc een vande ghevanghenen was, ende sij leeddense al met hemlieden om transoen thebben. tWas allen dach te doene up deen quaertier ofte up dandere.

Jn dit jaer, upden III Meye, vertoonden hemlieden ontrent Haerelbeke ontrent een hondert vijftich vrijbuyters; ende die vande wacht wierdent ghewaer ende sloeghen de clocke alarem; doen zij dat hoorden hebben zij tvier jnde stadt ghestecken, zoo datter ontrent elf huusen verbranden. Die van Cortrijck sloughen uuyte, daeraf datter wel XVIII ofte daerontrent soo ghevanghen als verslaghen bleven, maer zij en roofden niet.

....tHenden vande maent Novembre hadde tgarnisoen, dat te Steckenen lach, zeven vrijbuyters ghevanghen, die sijlieden alle deden hanghen.

Ende men seyde oock dat ten Crommen herinck, bij Lueven, noch XV roovers ghevanghen ende oock ghehanghen waeren.